Market chain kalpui tum a ni - Agriculture Minister

Agriculture minster C Lalrinsanga chuan nimin Assembly session-ah, society movement hmanga market chain kalpui tum a nih thu Assembly House a hrilh.

ZPM member C Lalsawivunga zawhna chhànnaah Agriculture Minister chuan, market chain kalpui tum a nih thu sawiin, "Agency-ah MIZOFED hmanga kalpuite kan rilrûk a, anni lam pawh committee leh huna ngaihtuah tur ruahmanna siam turin kan ti. Kan kal zel ang a, ṭha tak duan chhuah 

kan beisei," a ti.

C Lalrinsanga chuan, kumin chhungin buh leh bâl thar chhuah eng emaw zat Mizoram chhungah nei turah an inngai tih sawiin, "Thar chhuah zat kan la la khawm zo hlei thei lo," a ti a, hmun ṭhenkhatah chuan March chhungin buh an la seng dawn thu 

a sawi.

ZPM member Lalchhuanthanga zawhna chhangin Minister chuan, kut hnathawktute tana subsidy-a pek ṭhin tui lâkna polythene pipe chu kut hnathawktute'n an indaih zawk theih nan kawng hrang hranga hmalak a nih thu a sawi a, "Hemi atan hian CSS hnuaiah proposal siam a ni a, NEC hnuaia project siamah pawh telh 

a ni," a ti.

C Lalrinsanga chuan, pipe chu a dawng tur dik takte'n an dawng lo ṭhina an hriat thu sawiin, "A mamawh tak takte chu lo lamah an awm deuh chawt a, an rawn díl hman lo. A dawng tur dik takte'n an dawn theihna atan MLA-te hnenah kan sem a ni," a ti a; department official-te pawh a dawng tur ni lote'n an dawn lohna atan hma la tura infuih ṭhin a nih thu a sawi.