Kum 75 Zalenna Hlimawm Kûtpui

Independance Day vawi 75-na lawmna tura inbuatsaihna atan nimin khan Mizoram hmun ṭhenkhatah Bharat Ka Amrut Mahotsav (Kum 75 Zalenna Hlimawm Kûtpui) hman a ni. Bharat Ka Amrut Mahotsav hi nimin zing khan Aizawlah buatsaih a ni a, minister R Lalzirliana'n a vailiam. 

Rally hi Chanmari kawn leh Sikulpuikawn aṭangin ṭan a ni a, Vanapa Hall kawtah an intâwk khawm a ni. Chanmari kawn aṭanga kalte chu Hrangbana College zirlaite an ni a, Sikulpuikawn aṭanga kalte chu Govt. Aizawl College zirlaite an ni.

Mamit District Legal Services Authority (DLSA) chuan Mamit High School-ah Bharat Ka Amrut Mahotsav an buatsaih a, Mamit chief judicial magistrate leh DLSA secretary Laldinpuia Tlau-in zirlaite tana dan pawimawh zualte a sawi.

Mizoram University-a School of Social Sciences pawhin nimin khan 'India’s Freedom Struggle and Independence: 75 years of Journey’ tih thupui hmangin national seminar an buatsaih a; MZU School of Social Sciences dean Prof. Lalrintluanga'n kaihruaiin, MZU vice chancellor Prof. KRS Sambasiva Rao leh registrar Prof. Lalnundanga te chu khuallian leh khualzahawm an ni.