COVID-19 vanga dah hran mi 32 an awm Mizoramah COVID-19 kai hmuh a la ni lo

Nimin khan Health & Family Welfare minister Dr R Lalthangliana hoin COVID-19 (Coronavirus) chungchanga hmalak zel dan tur sawiho a ni. Meeting-ah hian Mizoramah rinhlelh thilah mi 32 dah hran an nih tawh thu leh sample test an thawn tawhah COVID-19 kai an la awm loh thu tarlan a ni.

Dr R Lalthangliana chuan, Mizoramah COVID-19 a lèn lohna turin theihtawp an chhuah tih sawiin, "Tih theih awm chin chu kan ti ve a, tih ṭhat lehzual dan ngaihtuah zel a ngai. Hmalaknaah hian hmanrua, pawisa leh mihringte a ngai a ni. Ṭul loah mipui tihchî-âi theih a ni a, chuvangin, ṭul loa mipui an chî-ài loh nan hmalak a ṭul," a ti.

Chief secretary Lalnunmawia Chuaungo chuan awareness neih ṭhat a pawimawh thu sawiin, "College leh sikulah COVID-19 awareness campaign neih a ṭul a, School Education leh Higher & Technical Education secretary-te pawh lehkha ka thawn tawh," a ti a; COVID-19 a lèn lohna tura hmalak tawh chin chu lawmawm a tih thu a sawi.

Health secretary H Laleng­mawia tarlan danin, Mizoramah COVID-19 kai hlauhthawn thilah mi 32 dah hran an ni tawh a; chu'ng mite chu damdawi-ina dah hran ni loin, an inah dah an ni. Sample test-te chu Guwahati-ah thawn zel a ni a, thawn tawh zingah COVID-19 kai hmuh an la awm lo.

COVID-19 kai an awm thulha a enkawlna atan State Referral Hospital-ah khum 32 leh district hospital tinah khum panga ṭheuh buatsaih a ni a; Lengpui Airport, Aizawl Civil Hospital leh State Referral Hospital-ah sample collection centre siam a ni.

Sorkar lu tihaitu ber chu Myanmar a nih thu sawiin Health Secretary chuan, "Zokhawtharah screening point siam ni mah se, ramri km. 500 vel kan nei a, rawn luhna tur a tam em em. Myanmar sorkar hi an transparent lo si a, Coronavirus vei lo lut palh se a buaithlak dawn. Hemi chung­chang hi sorkar laipuiah pawh kan thlen tawh a ni," a ti.

Ṭhutkhawmnaah hian HFW, School Education, Higher & Technical Education, Police leh Finance department hotute leh Assam Rifles hotute an tel a; hma­lakna tur hrang hrang an rêl a ni.

Meeting-a an rêlte

•    COVID-19 vei rinhlelhte an in leh loin a zir loh vanga harsatna neite dah hranna turin primary health centre-ah khum pathum ṭheuh, community health centre-ah khum panga ṭheuh leh sub-divisional hospital-ah khum panga ṭheuh siam.

•    Lengpui Airport-a thleng thar, COVID-19 natna veia rinhlelhte dah hranna turin Lengpui damdawi-in (PHC)-a AYUSH building chu a ṭul anga thuam ṭhat.

•    Zokhawtharah Survelliance & Screening Centre-ah darkar 24 duty indah leh duty tur chu Zokhawthara awm chilhtir.

•    Ram dang aṭanga Mizoram luh theihna khàn (entry point)-ahte screening ṭha zawk a awm thei nan leh ram dang aṭanga lo lut mikhual insawiselna neite chak taka hriat chhuaha dah hran a nih thei nan ramria awm khaw hrang hranga YMA branch leh V/C-te bakah, paramilitary force-te tih tak zeta thawhpui ni se.

•    Training of trainers hmanga Delhi-a kal mekte an lo haw hunah a hma thei ang bera sorkar leh mimal damdawi-ina thawktute COVID-19 chungchang zirtir.

•    Mipui hnena COVID-19 chungchang zirtirna leh awareness a zau thei ang ber tihdarh.