Chapchar Kût hman ṭan a ni

Nimin khan Mizoram sorkar leh Central YMA huaihawtin Lammualah Chapchar Kût hman ṭan a ni a, vawiinah Lammualah vêk a hunpui zawk hman leh tur niin, district khawpui tinah leh hmun dang ṭhenkhatahte hman a ni bawk ang. Kumina Chapchar Kût thupui chu 'Zo nun ze mawi chawisan' tih a ni.

Nimina Chapchar Kût hmannaah hian Art & Culture minister R Lalzirliana chu kûtpa a ni a, Art & Culture director R Hmingthanzuala chu kût thlengtu a ni. Kûtpa R Lalzirliana chuan, Chapchar Kût chu Mizo hnam hrang hrangte inpumkhatna kût ni se a duh thu a sawi a, "Inlungrualna leh inpumkhatna ṭha nei tur chuan hmun tina Zo fate kan ṭan rual a pawimawh," a ti. Mizo nun ze mawi leh tlawmngaihna chhawm nung zel turin kal khawmte a chah a, "Kan thupui 'Zo nun ze mawi chawisan' tih hi ṭhangtharte'n an vawn nun reng a ngai a ni," a ti. 

Chapchar Kût ni khatnaah hian hnam làm, zai leh rimawi, infiamna leh naupang intihhlimnate entir a ni a; vawiinah hman chhunzawm tur niin, thil chi hrang tam zawk entir tum a ni. Chapchar Kût pual hian nimin zing dar 6 khan Aizawlah 'Chapchar Kût Run' huaihawt a ni a; Sikulpuikawn leh Chanmari kâwn aṭangin YMA branch 104 member-te an tlân a, Lammualah an intâwk khawm. Lammualah hian Central YMA vice president Lalhmachhuana kaihhruaiin inkhawm tâwi neih a ni a, minister of state TJ Lalnuntluanga'n a hmanpui.

TJ Lalnuntluanga chuan, Mizo hnam chu Pathianin a duh taka a siam a ni tih sawiin, "Chungnunna thinlung kan put a ngai. Hnam dang kan ngaisang a nih pawhin, kan hnam zia hi kalsan lo ila, anni aiin kan chungnung tih i hria ang u. Mizoramah hnam dang an tlángnél a, Mizote hi Silchar kan pêl a, kan zum leh ṭhin. Hnam dang officer leh hruaitu lakah indah hniam loin indah chungnung zawk ang u," a ti. Mizote chu an inlungruala an inpumkhat zel a ṭul thu a sawi bawk. Chapchar Kût Run hi kum 2017-ah neih ṭan a ni a, kum tin neih a ni ta ṭhin a ni.