PAHOSS dawng tur mi 403 thlang tawh - Cheng nuai 20 aia tam dawng tur mi 83
Parking House Support Scheme (PAHOSS) hnuaia in sak ṭanpuina diltu mi 1,436 zingah Executive Committee-in mi 403 a thlang tawh a, cheng nuai 20 leh a aia tam pek tur mi 83 awmin, mi dang 320 chu cheng nuai 20 aia tlem a ni. In sak ṭanpuina dawng tur zingah Assembly speaker Lalrinliana Sailo a tel.
Vanglaini-in RTI Act hmanga UDPA department-a a zawhna, SPIO-in a chhàn danin, Aizawla PAHOSS dawng turte chu zone pali-ah North Zone, South Zone, East Zone leh West Zone-ahte ṭhen a ni. Cheng nuai 20 aia tam dawng turte chu North-ah mi 21, South-ah mi 32, East-ah mi 10 leh West-ah mi 20 an ni a, an vaiin mi 83 an ni.
Ṭanpuina dawng tam ber tura thlan East Zone-a mi H Biakṭhuama, Zemabawk Lungbial chu cheng nuai 200 pek tur a ni a, ani hi batch lina niin, LMV 200 dah theihna tur a ni. Cheng nuai 100 dawng tura thlan tawh mi panga an awm a, cheng nuai 50 dawng tura thlan tawh mi 15 an awm bawk.
PAHOSS dawng tura thlan tawh South Zone-a mite zingah Lalrinliana Sailo, Upper Republic telin, ani hi Assembly speaker ni mek a nih thu dawn a ni a, cheng nuai 141 pek tura thlan a ni. In sakna tur, parking location chu Republic Vengthlanga ITI Road, Near Hawla Indoor Stadium tih a ni a, 4th batch niin, LMV 101 leh two wheeler 245 dah theihna tur a ni dawn.
Cheng nuai 20 aia tam dawng tura thlan zingah Presbyterian Church, Zemabawk telin, nuai 62 dawng tura thlan a ni a, in an sakna tur chu Zemabawk North-ah niin, LMV 57 leh two wheeler 34 dah theihna tur a ni a, batch lina a ni. Cheng nuai 20 aia tlem dawng tur zingah kohhran leh local council ṭhenkhat leh college pakhat an tel.
UDPA department-in Aizawla PAHOSS a kalpui mekah ṭanpuina dawng tur mi 403 thlan tawh niin, chu'ng mite in sak tur chu lirthei 13,758 dah theihna tur a ni a, Rs. 62,51,00,000 pêk chhuah tura pawm a ni tawh. Ṭanpuina sum hi ṭum thum pek chhuah tawh niin, cheng nuai 1,003.30 pek chhuah tawh a ni.