COVID-19: Mizoram dinhmun Ni 2 chhungin chhuak awm lo

March 12, Zirtawpni khan Mizoramah Covid-19 vei hmuh chhuah a ni lo a, Inrinniah mi pakhat hmuh chhuah a ni. Inrinni leh nimin khan hripui laka fihlim tawh chhuahtir an awm lo.

Covid-19 vei Inrinnia hmuh chhuah chu Lengpui Airport screening point-ah RAT hmanga hmuh a ni a; Border Security Force sipai mipa kum 53, Maharashtra aṭanga rawn lut niin, Covid symptom nei lo a ni.

Mizoramah Covid-19 vei mi 4,436 hmuh chhuah a ni tawh a, mipa 3,236 leh hmeichhia 1,200 an ni. Nimin tlai dar 5 thleng khan mi 4,416 (99.55%) chhuahtir an ni tawh a, mi 10 (0.23%) thi tawhin, enkawl mek mi 10 (0.22%) an awm. 

Mizoramah March 12, Zirtawpni khan swab sample 511 endik a ni a; ZMC laboratory-ah sample 15, TrueNAT-PCR hmangin Kolasib-ah pakhat leh RAT hmangin district parukah sample 495 endik a ni.

Inrinni khan ZMC laboratory-ah sample 19 leh RAT hmangin district parukah sample 841 endik a ni a, endik zawng zawng chu 860 niin, chu'ng aṭanga Covid-19 positive hmuh chhuah pakhat chu 0.12% a ni. TrueNAT-PCR hmangin sample endik a ni lo.

March 13, 2021 thlenga Mizorama swab sample endik tawh zat chu 2,42,331 a ni a, chu'ng aṭanga Covid-19 positive hmuh tawh zat 4,436 chu 1.83% a ni. Hripui vei hmuh tawh zinga mi 2,118 chu Mizoram chhunga kái chhâwng an ni a, mi 2,318 chu Mizoram páwn aṭanga an rawn luh hnua hmuh chhuah an ni thung.

Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a, chumi hnua hmuh chhuah leh hmasak ber chu June 1, 2020-ah niin, ZMC laboratory-ah hmuh chhuah a ni. ZMC-ah hian Covid-19 positive 2,657 hmuh chhuah a ni tawh a, TrueNAT-PCR hmangin 674 leh RAT hmangin 1,104 hmuh chhuah a ni tawh.

Tun dinhmunah Mizorama district 11 zinga pariat - Lunglei, Siaha, Kolasib, Serchhip, Lawngtlai, Mamit, Khawzawl leh Hnahthial district-ahte Covid-19 vei an awm tawh rih lo. Aizawl, Champhai leh Saitual district-ahte hripui vei enkawl an la awm a ni.