BCM Assembly vawi 125-na a ṭiak

Baptist Church of Mizoram (BCM)-a inkhawmpui rorelna sang ber, Assembly vawi 125-na chu March 11, 2021 aṭang khan BCM biak-in, Lunglei Ramthar Vengah neih a ni a, nimin khan a ṭiak. Kumina BCM Assembly-ah hian palai kal tur zat tihtlem a ni a, palai 460 chuang an tel.

BCM Assembly hi March 11, Ningani zing dar 9:30-ah ṭan a ni a; president kal chhuak Rev. Dr K Lalrinthanga'n president thar (kum 2021-22) Rev. Dr V Laldingliana hnenah mawhphurhna a hlan hnuah president thar kaihhruaiin rorel a ni. Pastor pakhat leh kohhran upa 74-te sûnna hun hman nghal a ni bawk.

BCM inkhawmpui lianah hian agenda 30 chuang a awm a, March 11-13 chhungin rorel a ni. Kum 2022-23 chhunga BCM president atan Rev. Dr R Zolawma thlan a ni a, ani hi AICS-a zirtirtu ni mek a ni. Kum 2021-22 budget cheng nuai 11,460 an pawm a; pastor bial thar pariat - Chawngte West, Chawngte East, Ṭhuampui Aizawl, Zemabawk, Khumtung, New Serchhip, Saitual leh Khawruhlian bialte hawn an remti.

Nimin khan chawhma inkhawmah BCM President-in pastor atan mi pali a nemnghet a; chawhnu inkhawmah Lalpa zanriah sakramen a ṭheh bawk.

BCM Assembly report-a a lan danin, kum 2020-2021 chhunga BCM sum hmuh tura beisei chu Rs. 69,35,70,000 a ni a, April 2020 - February 2021 (thla 11) chhungin Rs. 65,15,42,530 (93.94%) an hmu tawh a, hmuh beisei zat Rs. 4,20,27,470-in an la pha lo. 

BCM Statistical Handbook 2020-2021-a a lan danin, Mizoram Baptist kohhranah hian tualchhung kohhran 666 awmin, chhungkua 36,904 an awm mek a; member 1,72,219 awmin, kum hmasa aiin 4,361-in an pung a ni.