Maubawkah in pariat a kâng ral

March 13, Inrinni zing dar 3:40 vel khan Maubawk, Aizawlah kângmei a chhuak a, in pariat, chhungkaw 15 luah lai a kâng ral vek. Kângmei chhuak avang hian mihring thi leh hliam an awm lo a, ran thi a awm nual thung.

Vanglaini thu dawn danin, kângmei hi Thankhuma te in hnuaia ar in aṭanga chhuak ṭan a ni. Thankhuma in hnuaiah hian Vannunthianghlima te chhungkua awmin, chumi hnuai lehah chuan ar an vulh a ni. Vannunthianghlima te chhungkuain in a kâng tih an hre hmasa ber a, Fire & Emergency Services (FES) hriattir nghal niin, FES pawhin in kanna hmun an pan nghal.

Kângmei chhuahna hmun panna kawng a têt avangin kâng­ṭhelh motor lian a lut thei lo a, a lut thla thei zawk Pik-Up motor chu a khâwl a chian loh avangin hman theih a ni lo. Kangṭhelh motor lian zawka pipe zawm belh niin, chumi hmang leh mipuiin tui awm remchang ang ang hmangin kâng ṭhelh hna thawh a ni.

In kângah hian gas bûr a puak a, thing leh thil dang alh hmun hrang hrangah a tidarh a, chuvang chuan in dangte a kan phaha hriat a ni. Zing dar 6 velah kângmei chu ṭhelh mih a ni.

In pariat a kan ral bakah hian kângmei hian in pali dang a nghawng a, harsatna lian tham a thlen hmain ṭhelh mih a ni. Chhungkaw pariat chuan bungrua an chuh hman lo a, chhungkaw pasarih chuan bungraw ṭhenkhat an chuh hman thung. Chhungkaw 15 zinga pakhat chu community hall-ah awmtir an ni a, mi dang zawng chuan an chhungkhatte leh ṭhenawmte an bêl. 

Kângmei chhuak avang hian mihring thi leh hliam an awm lo a, ar 18, vawk pahnih leh ui pakhat an kâng hlum thung.

Maubawk khawtlang chuan Inrinni khan khawtlang hnatlang an ko nghal a, kângmeiin a tihchhiat hnuhmate an senghawi. Vawiin hian hnatlang an nei leh dawn a, in thawm ṭhat ngai leh ṭul dangte an buaipui ang.

Kângmei tuarte ṭanpuina atan Maubawk khawtlang chuan ram hruaitu, local council, YMA branch leh mimal eng emaw zat aṭangin ṭanpuina cheng nuai sarih chuang leh bungraw chi hrang hrang an dawng tawh a; he thu ziah lai thleng hian a luh belh zel a ni.