KHAWTHLIR

March 13, Inrinni khan KṬP, Mission Vengthlang Branch chuan an kohhran hall-ah thisen pek an huaihawt a, Synod Hospital tan mipa 55 leh hmeichhia pasarihte'n thisen unit 62 an pe. Inrinni vêk khan Lungleia Adventist Youth Federation-te'n Christian Hospital tan thisen unit 44 an pe a, petute mipa 36 leh hmeichhia pariat an ni a; Isua Krista Kohhran (IKK) Ṭhalai Pawl, Siaha Pastor Bial pawhin Siaha District Hospital tan unit 23 an pe a, a petute hmeichhia 12 leh mipa 11 an ni.

Indian Oil Corporation (IOC)-in India rama petrol pump ṭha 15 a thlan zingah Labiakliana Filling Station, Ramhlun Venglai a tel. March 11, 2021 khan Lalbiakliana FS neitu Julie Lallianzuali chuan Ramoji Film City, Hyderabad-ah IOC chairman SM Vaidya hnen aṭangin Member Chairman Pannel Award 2020-21 a dawng a ni.

School Education minister Lalchhandama Ralte-in INC member Nihar Kanti Chakma zawhna ziaka a chhan danin, Mizoramah zirtirtu pakhat chiah awmna sikul pasarih a awm a, chungte chu - Saitlaw P/S, Andermanik P/S, Tuipuibari P/S-III, Bandiasora P/S (Begali Medium), Bandiasora P/S (Bengali Medium), Puankhai P/S (Bengali Medium) leh Samuksury P/S (Bengali Medium)-te a ni. 

Khawzawl District Disaster Management Authority hnuaia Quick Response Team member-te tan March 13, Inrinni khan Murlen National Park-ah Alpine Style Search and Rescue training buatsaih a ni a, district bawrhsap Zothanmawia'n a hmanpui. 

Jeriko Khualbuk chuan Inrinni khan an din champha vawi 31-na an lawm a, Aizawl mayor Lalrinenga Sailo-in a hmanpui. Jeriko Khualbuk hi March 7, 1990-ah din a ni a, hmeichhia, ruihhlo leh a kaihhnawih avanga harsatna tâwkte leh dinhmun tleu laklawhte'n rahbi thar rap a, nun thar an neih theihna tura enkawlna hmun a ni.