Ram hruaitute'n Maubawk in kâng an tlawh

Inrinni zing dar 3:40 vela Maubawka in pariat kâng chu ram hruaitute'n an ngaihven a, Inrinni khan mi eng emaw zat chuan a hmunah tlawhin ṭanpuina an pe.

Disaster Management & Rehabilitation (DMR) minister Lalchamliana chuan Inrinni chawhnu khan in kângte a tlawh a, kângmei tuarte a tawrhpui thu sawiin, "District aṭanga chhiatna tâwkte ṭanpuina dan neih sa angin ṭanpuina pek a ni ang," a ti a, khawtlang hruaitute hnenah a mimal sum Rs. 10,000 a hlàn.

Bialtu MLA VL Zaithanzama chuan kângmei tuarte a tlawh nghal a, a ṭul apianga hman turin khawtlang hruaitute hnenah Rs. 10,000 leh tarpouline eng emaw zat pein, a hnatlang ve nghal. VL Zaithanzama chuan, kângmei tuar chhungkuate chhawmdawlna tur sorkarin rang taka a ngaihtuahsak theih nan a theih ang anga hmalak a tum thu a sawi.

Minister of state Lalruatkima pawhin zing karah kângmei chhuahna hmun hi a tlawh a, khawtlang hruaitute hnenah Rs. 10,000 a hlàn.

Congress Legislature Party (CLP) deputy leader C Ngun­lianchunga leh Lalrindika Ralte, MLA-te pawhin Inrinni chhûn khan in kanna hmun an tlawh a, CLP hmingin Maubawk Branch YMA hruaitute hnenah Rs. 30,000 an hlân bakah, hnatlangte ei leh in senso atan an mimal sum Rs. 3,000 ve ve an pe a ni.

C Ngunlianchunga chuan, kângmei vanga chhiatna thleng chu pawi an ti tak zet tih sawiin, "Chhiatna tâwkte kan lainatin kan tawrhpui tak zet. Anmahni chhawmdawlna kawngah theihtawp chhuah kan inhuam a, Mizoram sorkar pawhin chhawmdawlna ṭha taka a pek kan beisei," a ti.

AMC hotute pawhin mayor Lalrinenga Sailo hoin an tlawh a, kângmei tuarte chhawmdawlna atan Rs. 10,000 an hlàn. Mayor chuan, chhiatna thleng chu pawi an tih thu sawiin, "Aizawl khawpui enkawltu kan nih angin he chhiatna thlengah hian theihtawpin hma kan la dawn a ni," a ti a, an tih theih chinah an tlànchhiat loh tur thu a sawi.

AMC inthlana Maubawk awmna ward (XV)-a ZPM candidate R Lalnunthara pawhin kângmei chhuahna hmun a tlawh a, khawtlang hruaitute hnenah Rs. 4,000 a hlàn a ni.