Covid vaccine mi 44,726 pe tawh

March 13, Inrinni thleng khan Covid-19 hripui laka invênna damdawi (vaccine) Covishield mi 44,726 hnenah first dose leh mi 10,084 hnenah second dose pek a ni tawh.

Covid vaccine hi pek hmasak ber - healthcare worker-te chu first dose pek kim an ni ṭêp tawh a, second dose pawh a tam zawk pek an ni tawh. Frontline worker-te pawh first dose pek zawh thawkhat a ni tawh a, second dose la tawh tlem azawng an awm laiin, a tam ber chuan second dose lâk theih hun an nghak mek.

Tun lai hian kum 60 chung lamte leh kum 45-60 inkar, natna benvawn neite first dose pek mek a ni. March 13, Inrinni khan healthcare worker mi 287 hnenah first dose leh mi pahnih hnenah second dose pek a ni a, frontline worker mi pali hnenah first dose leh mi 74 hnenah second dose pek a ni. Kum 45-59 inkar mi 11 leh kum 60 chung lam mi 178 hnenah first dose pek a ni bawk.

Covid vaccine hi first dose bik chu March 13, 2021 thlengin healthcare worker 12,048, frontline worker 19,576, kum 45-59 inkar mi 1,140 leh kum 60 chung lam mi 11,962 pek a ni tawh a; healthcare worker mi 10,008 leh frontline worker mi 76 hnenah second dose pek tawh a ni.