Minister-in Lunglei Civil Hospital a tlawh

Health leh Higher & Technical Education department changtu minister Dr R Lalthangliana chuan March 13, Inrinni khan Civil Hospital, Lunglei leh Kendriya Vidhyalaya School a tlawh a, an dinhmun a enfiah.

Dr R Lalthangliana hian cheng nuai 380 chuang sênga Lunglei Civil Hospital-a Trauma Centre leh RT-PCR laboratory sak mekte a tlawh a; tuiah harsatna an nei tih loh chu harsatna lian an neih loh thu thawktute'n an lo hrilh.

Lunglei Civil Hospital-a RT-PCR laboratory, cheng nuai 140 sénga sakna tur chu sum harsat avangin hmalak zung zung a harsat thu sawiin Minister chuan, "Thawktu eng emaw zat lak thar a ngaih dawn avangin hmalak chak a harsa a, a theih ang anga bawhzui mek a ni," a ti a; damdawi-in chu a hma thei ang bera rawng hnawih ṭhat a nih tur thu a sawi.

Dr R Lalthangliana hian Ramthar Venga Kendriya Vidhyalaya leh MAMCO kaltlanga sikul sak mekte a tlawh a, hmalakna leh hmachhawpte a enfiah a; Kendriya Vidyalaya chu chak taka bawhzui a nih theih nan sorkar laipuiah thlen a tum thu sawiin, "Kawng tinrenga sikul tan ṭha taka hma in lak a, in enkawl ka duh," a ti.

Kendriya Vidhalaya-ah hian zirlai 239, principal pakhat, zirtirtu nghet 15 leh contract zirtirtu pathum an awm mek a ni.