Minister-in Serchhipa zirna-inte enfiah

School Education minister Lalchhandama Ralte chuan March 13, Inrinni khan Serchhipa zirna-inte a tlawh a, zirna in tihchangtlun dan tur leh in sak mekte a enfiah.

Lalchhandama Ralte chuan, sorkarin zirna a ngaih pawimawh thu sawiin, "Zirna hmunhma tihchangtlun dan kawng dap zel a ni a, in hlui tawh sak ṭhat te, building ṭha awm sate a ṭul anga sak zawm tura hmalak zel a ni," a ti a; sorkarin zirna tihchangtlunna tura hma a laknate ṭawiawm turin khawtlang hruaitute a sáwm.

Sikul leh hostel sak mekte chu drawing anga sa tura thawktute chahin Minister chuan, "Zirna siam ṭha turin hmun tinah zirnain hmun pawimawh a chan a, ngaih pawimawh a hlawh a ngai. Chuvangin, a luahtu turte lungawina tling khawpa sak a ṭul a ni," a ti.

Education Minister hian Serchhip DIET sak zawm dan turte leh hostel sak mek te, Serchhip Higher Secondary School leh Serchhip High School sak mek te, Chanmari Middle School leh Field Veng Primary School-te a tlawh a ni.