Kohhran Hmeichhiate'n Covid-19 pualin Ram pumah ṭawngṭai rual an rêl

March 10-12, 2021 chhung khan Khatla Kohhran biak-inah Presbyterian Kohhran Hmeichhe Inkhawmpui Lian vawi 49-na neih a ni a, Covid-19 a reh theih nan ram pum huapa ṭawngṭai rual an rêl.

Kohhran Hmeichhe Inkhawmpui Lianah hian March 11 khan chairman Lalrinkimi kaihhruaiin rorel a ni a, palai mi 249 an tel. Covid-19 hripui léng a reh theih nan ram pum huapa ṭawngṭai rual an rèl bakah, ram pum huapin rilru hriselna (mental health) chungchang inzirtirna neih an rél a; ram pum huapin kumin chhungin literature week hman an rél bawk.

Kum 2021-23 chhunga office bearer turte an thlang a; chu'ngte chu - chairman Sailuti, Mission Veng Bial (Synod ruat), vice chairman Vanlalhruaii, Ramhlun North Bial, general secretary H Lalfakmawii (Synod ruat), assistant secretary Dr Lalthansangi Fanai, Bungkawn Bial, treasurer Lalrinliani, Chaltlang Bial leh finance secretary Lalhmingliani, Electric Veng Bialte an ni.

Kohhran Hmeichhe Inkhawmpui Lian hi Covid-19 avangin tih dan phung pangngai angin hman theih a ni lo a, rorel palai (pastor bial aiawh)-te leh Synod puipate chiah telin, palaite chu an riak lut vek a ni.

Kum 2020 inchhiarnaa a lan danin, Kohhran Hmeichhiaah hian kohhran leh branch church 963-a chhungkua 1,13,438-ah member 1,83,922 an awm a; ni tin chhung inkhawm nei thei 68.19% leh buhfaiṭhàm ṭhâm ziah 98.39% an awm a ni.