Ramri committee an ṭhukhawm hnai MZP-in sorkar hmalakna an duhkhawp lo
Mizoram leh Assam ramri chungchang ngaihtuah tura din core committee, Chief Secretary kaihhruai chu tun thla hian an ṭhukhawm leh dawn. Hetih lai hian, MZP chuan ramri chungchanga sorkar hmalak dan an duhkhawp lo.
Vanglaini palai zawhna chhangin MZP president L Ramdinliana Renthlei chuan, ramri chungchanga sorkar hmalak dan an duhkhawp loh thu a sawi a, "Sorkar hmalak dan kan duhkhawp loh avangin kan au chhuak leh
ṭhin. Tun aia chak zawk leh ṭha zawk hian hma a lak theihin kan hria a, chutiang chuan hmalak ni se kan duh," a ti.
MZP President chuan, Bairabi Zophaia Zofate Chawlhbûk sak chu an dinna a la nih reng thu sawiin, "Sorkar hmalak dan kan ngaichâng reng a, tuna sorkarin a din Core Committee hian engtin nge hma a lak dawn kan la hre lo a, an thutlukna kan nghak," a ti a; sorkarin an beisei anga hma a lak loh chuan Zofate Chawlhbuk an sak leh tur thu a sawi. Hetih lai hian, Bairabi Joint Village Council leh All NGO chuan May 4, 2019 khan MZP Sub-Headquartes, Bairabi hnenah lehkha thawnin, Bairabi Zophai hmuna hma la lo turin an hriattir.
Lehkhaah hian Bairabi Joint V/C leh NGO-te May 4, 2019 zingah an ṭhutkhawm thu tarlan a ni a, "Mizoram sorkar, Kolasib DC leh Hailakandi DC ten state pahnihte harsatna chingfel tura hma an lak lai mek leh Home Ministry-in status quo maintain tura hmalakna kal lai mek a ni a, Zophai hmuna MZP Gen.Hqrs.-te'n hma thar lak an tum hi ṭha kan ti lo. Engti zawng pawha hmathar lak hi rem kan ti lo," an ti. Bairabi Joint V/C leh NGO-te chuan an lehkhaah hian Bairabi khuate'n an huam chin thlamuang taka an enkawl zel theihna atan hma an lak dawn thu an tarlang tel a ni.
Vanglaini palai zawhna chhangin Bairabi MZP hruaitute chuan, Bairabi Joint V/C leh NGO-te meeting-ah hian an tel ve loh thu an sawi a, "Kan sawiho a, kal loh kan ti a, kan tel lo," an ti a; Bairabi-ah V/C pahnih a awm a, MNF V/C ve ve a nih thu an sawi. MZP Gen.Hqrs. president L Ramdinliana chuan, May 4, 2019 khan Zophaiah banner tár tura kal an tum thu a sawi a, "Hetianga min lo meeting hnan tâk avang hian kan kal leh ta lo. Remchang hmasa berah kal ngei kan tum," a ti.
Mizoram leh Assam ramri ngaihtuahtu atana din Core Committee hi March 22, 2019-ah an chairman Lalnunmawia Chuaungo, chief secretary hoin a pisaah an ṭhukhawm a; Assam leh Mizoram ramri chinfel a nih theihna tura hmalakna awm tawh leh hmalak mekna te, Mizoram map hman lai dik lo awm leh a siamṭhat dan tur point hrang hrangte enho a ni. Meeting chuan, document neih angte duhthusam a la nih loh avangin March 2019 chhungin document leh sorkar notification mamawh angte lak khawm a, chumi hnua sawiho leh an rél a; Mizoram ṭan chhan tur document ṭha leh notification rintlak neih kim a, an sawiho leh hnuah Chief Minister hnena thehluh turin thutlukna an siam. Vanglaini thu dawn danin, Core Committee chairman Chief Secretary chuan May thla tìr lamah meeting neih leh a nih tur thu a sawi a ni.