Hmun hnihah in pahnih a kâng

May 4, Inrinni khan Champhaiah leh Keifangah in pakhat ve ve bungrua chuh hman lohin a kâng ral a, vawiin hian khawtlangin in an sak ṭhatsak dawn.

Champhai Tlangsama Hrangkianlova in, Assam type chu Inrinni zing dar 5 velah a kâng. In chhungah Hrangkianlova a awm a, a ṭhenawmte'n in a kan thu an hrilh hnuah a tlan chhuak. Kângmei hian bungrua bakah, thingzai kháwl leh scooty pakhat a kâng chhia a ni.

Keifangah pawh Inrinni chawhma dar 9:45 vel khan Hmangaih Johana in, Assam type a kâng a, bungraw chuh hman a ni lo. Keifang Leitan YMA hruaitute hnen aṭanga thu dawn danin, vanduaina tâwkte chu YMA leh MHIP-in vehbûr an khawnsak a, vawiinah in an sak ṭhatsak dawn. Bialtu MLA R Lalzirliana'n in sakna atan hian rangva bundle li a thawh.