Intlânchhâwk vangin lirthei a pung Traffic jam a ziaawm phaha ngaih a ni

Coordination Committee on Traf­­fic Management rawtna angin, Aizawl khawpuia traffic jam nasa lutuk tihziaawmna turin, Mizoram sorkar chuan November 1, 2017 aṭangin lir­theite intlanchhâwk a kalpui a; chu chuan awmzia a neia an hriat thu traffic police hotute hnen aṭanga dawn a ni. Chutih laiin, lirthei intlanchhawk hnuah lirthei punna a sang chak hlea sawi a nih laiin, transport department chhinchhiahna aṭanga a lan dan chuan, lirthei intlanchhawk hnu hian, thla tina lirthei register thar zat chu a pun belh ngei a, mahse inthlanchhawk hma lam aia a punna hi tihtham a ni lem lo tih transport department chhinchhiahna aṭangin a lang thei. Lirthei intlanchhawk hma aṭangin, lirthei pun dan rate hi a lo sang ve hrim hrim niin a lang. Inthlanchhawk tirh thla November 2017 khan Aizawl DTO-ah lirthei thar 1,309 ziah luh a ni.

Aizawl DTO (Urban) chhin­chhiah danin, kum 2017-ah khan September thla tih lohah chuan thla tin lirthei ziah luh thar zat hi a pung a; January 2017-ah 984 leh September 2017-ah 954 ziah luh a ni a, thla dang zawngah erawh chuan sang khat a chuang ziah a, thla tin a pung bawk.

Kum 2018-ah chuan March thlaah 993 ziah luh a ni a, thla dang zawngah chuan sang khat a chuang vek. April 2018-ah 1,181, May-ah 1,492, June-ah 1,333, July-ah 1,408 ziah luh a ni a, a hnu zela ziah luh zat pawh thla tinin 1,400 aiin a tam ziah tawh. October 2018-ah Aizawl DTO (Urban)-ah hian lirthei 1,646 ziah luh a ni a, chu chu lirthei intlanchhawk hnua lirthei register tam ber thla a ni.

Hetih lai hian, Aizawl DTO chu August 29, 2017-ah hmun pahnihah ṭhen a ni a, Aizawl DTO Urban leh Aizawl DTO Rural tih a ni. DTO Urban chu Aizawl khawpui chhunga lirtheite ziah luhna tur a ni a, MZ-01 a ring zui a, DTO Rural chu Aizawl district-a Aizawl khawpui tih loh khaw dang zawnga lirtheite ziah luhna tur a ni a, MZ-09 an hmang a ni.

Aizawl DTO Rural-ah hian, hawn a nih hnuah kum 2018-a February, March, April leh June thlaahte lirthei ziah luh 100 a tling lo a, a bak zawngah chuan 100 a chuang vek. Thla tinin lirthei ziah luh pung ziah lo mah se, a pung hret hret tih erawh a lang thei. Aizawl DTO Urban leh Rural-a lirthei ziah luh zat belh khawm chuan, lirthei intlanchhâwk hma ai chuan intlanchhâwk hnuah Aizawl district-ah lirthei register thar a tam zawk tih a hmuh theih a ni.