Mihring hralh tur hnam dang mi 14 man

YMA leh Police-te ṭang­kawp chuan nimin tlai khan Edenthar Veng, Aizawl chuanhnuai lama Denghliri te inah hnam dang kum tlinglo nia hriat hmeichhe pariat leh mipa pali, Myanmar ram lama hruai tur an hmu chhuak a, Bawngkawn Police Station-ah dah an ni.

Edenthar Veng Branch YMA hruaitute sawi danin, Denghliri in leh a chhehvelah hnam dang eng emaw zat hmuh an ni fo a, chu vang chuan finfiah tur an intír a ni. An enthlak hnuah Central YMA hruaitute an pun a, Central YMA president Vanlalruata leh vice president R Lal­ngheta hoin police-te nen Denghliri ina hnam dangte chu an la chhuak a ni.

Denghliri'n Vanglaini a hrilh danin, a unaunu fanu Madiki, Tahan, Myanmar-a miin motor hmanga hnam dangte an inah an rawn dah dawn thu leh lo buaipui turin a hrilh ṭhin. Zan khat vel an riah hnuah Myanmar lam panin phurh leh ṭhin an ni. Nimina an lak chhuahte hi ṭum nga hnam dang an dah khawmna a ni a, driver hrang hrangin an dah a, an lam leh ṭhin.

Hnam dangte hian document kawl an nei lo a, mobile phone an kawl a, mahse, sim card a awm lo. Hnam dang an man takte chuan, Bangladesh refugee camp aṭangin Karimganj, Assam-a hruai an nih hnuah Mizoram an rawn panpui leh thu an sawi. An vai hian Hindi an thiam mumal lo.

Central YMA president Vanlalruata chuan April 22, 2019 khan police hotute nen human trafficking kawnga Mizoram hman chungchang an sawiho thu a sawi a, "Document pawh nei mumal lo Vairengte leh Zokhawthar police checkgate paltlangpui theih reng an la ni hi a mak khawp mai," a ti.