KHAWTHLIR

Inrinni khan Isua Krista Kohhran (IKK) Ṭhalai, Aizawl City area chuan IKK Hqrs. building, Vaivakawnah blood dona-tion camp an huaihawt a, an member mipa 38 leh hmeichhia pariatte'n Aizawl Civil Hospital tan thisen unit 46 an pe. LIKBK Ṭhalai Pawl, Lawngtlai Vengpui Bial chuan Lawngtlai District Hospital tan thisen unit 32 an pe a, a petute mipa 26 leh hmeichhia paruk an ni a; Edenthar Veng Branch KṬP pawhin Synod Hospital tan thisen unit 31 an pe a, a petute mipa 25 leh hmeichhia paruk an ni.

Presbyterian Church of India hnuaia ṭhalai pawl, Presbyterian Youth Fellowship (PYF) chuan May 3, Zirtawpni aṭang khan Mawkhar Kohhran, Shillong-ah Biennial Conference an hmang a, nizan khan a ṭiak. Inkhawmpuiah hian Mizoram aṭangin Central KṬP hruaitute telin palai 100 an kal. Inrinni khan kum 2019-2021 chhunga PYF hruaitu turte thlan a ni a, Central KṬP aṭangin Lalrinchhana Ralte chu assistant secretary atan an thlang a, Committee member atan PC Lalrinsanga thlan a ni.

Young Lai Association (YLA)-in kumpuan atana an hman, faina leh thianghimna tih bawhzuiin YLA branch hrang hrangte chu May 4, Inrinni khan an khua/veng chhung ṭheuhah an hnatlang a, vantlang hmunte an tifai. Hna­tlangte chuan kawng ko hnim leh lungrem, tuihâwk luankawr leh bawlhhlawhte an tifai.