VB-Agri product hmangin fall armyworm bei
Tunlaia Mizoram mai bakah, India ram hmun hrang hranga vaimîm ei chhetu, loneitu tam takin an buaipui mek fall armyworm chu Mizoram University-a Research Wing leh VB- AGRI, Haulawngte chuan an zir chiang a, VB-Agri product (soil amendment fertilizer) hmangin an enkawl chhin.
Vaimim ei chhetu pangang fall armyworm hi chemical pesticide hmanga beih a nih chuan, mihring leh nungcha dangte tan a hlauhawm thei a, soil microbe a that thei a, rannung a thah avangin ecological balance a tiṭhuanawp theia ngaih a nih avangin chemical tel loa beih chu finthlakin an hria a ni.
Chemical tel loa hlo túr, rannung thahna leh leiṭha siam chhuaktu Ramdinmawia (VB-Agri), Haulawng chu a thil siam chhuahte fall armyworm-ah enchhin tura beisei a nih angin, May 3 khan pangangin a beih vaimim hmunah VB-Agri product hnathawh dan an enchhin a ni.
Enchhinnaa a lan dan chuan, VB-Agri product chuan fall armyworm-te chu a hnawt darh ngei a; engtiang taka ṭha leh ṭangkai nge tih te, hna a thawh dan tak tihchian nan enkawl chinte chu chhinchhiah vek a ni a, endik leh a ni ang.
VB-Agri product hi bio-organic a nih avangin mihring leh nungchate tan a him a, rannung that loin a hnawt bo niin an tarlang a; deodorizatiio a nih bakah leia soil microbe a thah ve loh thu te, decomposer a nih nghal bawk avangin fall armyworm beih nana enchhinna chu a hlawhtlin chuan a ṭha em em bik dawn thu an sawi bawk.
MZU Research Wing chuan fall armyworm-te chu an ei chhiat leh tawmna vaimîm kûng chawpin an la a, MZU laboratory-ah an endik dawn a ni.