Chhiatrupna thleng palh lakah Sorkar a inbuatsaih lawk ṭhin - Chama

Aapda Mitra Training of Community Volunteers in Disaster Response, Mizoram Chapter (chhiat tâwkte ṭhian) batch palina tana training, chawlhkar hnih awh State Training Centre, Tanhrila buatsaih chu May 3, 2019 khan khâr a ni. Khârna inkhawm hmanpuitu Disaster Management & Rehabilitation (DMR) minister Lalchamliana chuan, chhiatrupna thleng palh lakah sorkar a inbuatsaih lâwk ṭhin thu a sawi.

Lalchamliana chuan, khawvel hmun hrang hrangah khuarel chhiatrupna a thleng fo tih sawiin, "Mizoram bikah phei chuan fûr laiin leimin leh tuilian vanga harsatna hrang hrang tâwk thei kan ni tih hriain, sorkar pawh a inbuatsaih lâwk ṭhin. Chhiatrupna a thlena pawimawh chu, chhiatna dinhmun leh awmzia rang taka chhût fel vat te, nunna chhanhim theihte him leh rang taka chhanchhuah hna thawh vat leh, hmun hima awmna ngaihtuahsak te, nunna chhan hman lohte pawh lak chhuah thuaite a ni," a ti.

Chhiatrupna a thlenin Mizo tlawm­ngaihnaa chêt chhuah zung zung piah lamah, a bika inzir chhuak tawh State Disaster Response Force (SDRF) leh training nei ṭha adventure club-te thiamna a taka hman ṭangkai a ni fo tawh tih sawiin Minister chuan, "Mizote hi hnam tlawmngai, ṭanpui ngaite ṭanpui ṭhin kan ni," a ti a; chhiatrupna leh chetsual palh a lo thlen changa ṭangkai leh hma hruaitu pawimawh chu YMA/khawtlang an nih thu a sawi.

Lalchamliana chuan, sorkar leh khaw­tlang ṭanrualna ṭha avangin chhanchhuah leh chhawmdawl hna rang leh sâwt taka thawh a ni ṭhin tih sawiin, "Chhiatrupna thlenna hmunah a kawng-hmang hriat tâwk loh avangtein kan inpekna leh inhuamna phû tawkin kan thawk sâwt lo fo. Chuvangin, DMR department hmalaknaa kan ṭangkai leh zual theihna tura training buatsaih a ni hi lawmawm. Tih tur leh tih loh tur hriatnaahte nasa takin hma min sawntir ang a, anni zarah nunna tam tak chhanhima a awm theih ka beisei," a ti.

Training-ah hian YMA branch 10 aṭangtein YMA volunteer mi 54 an tel a; 1st. Bn. NDRF, Mizoram College of Nursing (MCON) leh Sports & Youth Services department mite'n thil pawimawh hrang hrang an zirtir a ni.