MZP-in Zophaiah banner an târ Venhimsak turin sorkar an ngen

MZP Gen.Hqrs. hruaitute chuan nimin khan Zofate Chawlhbûk an lo sak tawhna hmun Bairabi Zophai an tlawh a, chawlhbûk an sakna tur hmunah chhinchhiahna (site banner) an tár. An banner tàr chu lâk thlâk a nih loh nan venhimsak turin Mizoram sorkar an ngen.

MZP president L Ramdinliana Renthlei chuan, sorkar laipuiin Zophai leh a chhehvel chu khawih rih lo turin Assam leh Mizoram sorkar ti mah se, Assam lamin lote an vât a, huante an siam leh tawh tih a sawi a, "Mizoramin kan zawm ṭhat em em laiin, Assam lam chuan hmathar an la zel a ni," a ti a, Assam lam hmalak dan chu chiang taka an hmuh thu a sawi.

MZP chuan nimin khan thuchhuah siam nghalin, Zofate Chawlhbûk sak an tumna hmun Bairabi Zophai chu Mizoram chhung ngei a ni tih an sawi nawn a, "He lai hmun hi Mizoram chief minister hmasa ber Pu Ch. Chhunga (L) leilet a ni a, Assam hian min chuhpui zawk a ni," an ti.

MZP chuan, Mizo pi leh pute luah chin ram Mizoram chin humhalh a, Mizote'n an neih lêt leh ngei theih nan hma an lak chhunzawm zel dawn thu tarlangin, Mizo mipuite chu an hmalakna tiṭhuanawp zawnga awm lo tur leh an hmalakna ṭawiawm zel turin an sâwm a ni.

Bairabi V/C-te leh NGO-te thuchhuak, 'Bairabi Zophai hmuna hma thar la tawh lo tura MZP-te a hriattir' chu zahawm an tih thu tarlangin MZP chuan, "Amaherawhchu, Bairabi Zophai hmun hi Mizoram chhung ngei a ni a, kan ramri chinfelna tura hmanraw pawimawh tak a nih avangin Zofate Chawlhbûk sak kan tum hi chawlhsan theiah kan inngai lo," an ti.

MZP chuan, Bairabi V/C-te chu hrethiam hrâm tura ngenin, "Ram leh hnam tan a ṭul apianga MZP-te min lo thawhpui ṭhin tawh angin min thawhpui chhunzawm zel turin thinlung takin kan ngen a ni," an ti a; Bairabi Zophai hmuna Zofate Chawlhbuk sak a nih theih nan hma an lak chhunzawm zel dawn thu an tarlang.

Mizoram sorkar kaihhruaina hnuaiah Assam-Mizoram ramri ngaihtuahtu tur Core Committee siam a ni tih sawiin MZP chuan, "Core Committee hian hma la ve zelin, tunah hian hmachhawp ṭhahnem tak a la nei a ni," an ti a; Core Committee-in chak lehzuala hma a lak theih nan ṭan la lehzual turin Mizoram sorkar an ngen.

Zophaia banner an tàrna hmunah hian MZP hruaitute chu an president L Ramdinliana Renthlei hoin an kal a; nimin vek khan Zophaia IR police post hmun an tlawh nghal. MZP tarlan danin, Zophai IR Post-ah hian sipai 21 an awm mek a, a panna kawng a chhe hle. IR-te chuan motor an kawl lo a, an hmunhma pawh thuamṭhat a ngai tawh hle a ni.