Lirthei intlân chhâwk a ṭhat loh chuan tihtawp leh nghal tur a ni - Lalchamliana

Home minister Lalchamliana, Coordina-tion Committee on Traffic Management-a chairman ni bawk chuan, Aizawl khawpuia lirthei intlân chhâwk dan tur sorkarin a ruahman thar chu enchhinna tur a ni a, a ṭhat loh chuan tihtawp leh nghal tur a nih thu a sawi.

Nimina Mizo Hnam Rûna inkhawmah minister Lalchamliana chuan thu sawiin, kumin June thla chhunga lirthei intlân chhâwk dan thar ruahman chu enchhinna a nih thu a sawi a, "Kan CM Pu Zoramthanga hian traffic jam a vei tak zet a, chumi atan chuan kawng hrang hrang hmalakna lian tham a kalpui mek. Traffic Management Committee pawhin traffic jam a ziaawm phah beiseiin intlân chhâwk dan thar kan enchhin dawn a, a ṭhat chuan kan hmang zui ang a, a ṭha lo a nih erawh chuan tihtawp leh nghal tur a ni," a ti.

Lalchamliana chuan, Zoramthanga kaihhruai sorkarin sorkar an din tûk aṭangin chak takin hma a la nghal nia sawiin, "Election manifesto pawh kan tihlawhtling nual tawh. Eirukna do tur Lokayukta pawh sorkarin ngaih pawimawh hmasakah a nei a, din chhoh mek a ni. Zu zawrh tihtawp mek a ni te, sum awm ang ang pawt khawma nasa taka kawng chhia siamṭhat mek a nite hi a lawmawm hle. Manifesto la tihhlawhtlin lohte pawh a tahtawla tihhlawhtlin zel a ni dawn," a ti a; martar chhungte leh ram leh hnam vanga rammute tan special scheme siam a nih dawn thu a sawi.

Home Minister chuan, MNF ministry-ah minister of state-te chu independent charge vek an nih avangin cabinet minister-te nen an danglamna a awm lo tih a sawi a, "An department chan ṭheuhah thuneihna tawp an neih bakah Council of Ministers ṭhutkhawmah pawh an tel vek. Kan hotupa ber hnuaiah tu pawhin kan ngaihdan tlang takin kan sawi ngam ṭhin hi a lawmawm hle a, kan CM inngaihtlawmna hi a chhuanawm hle a ni," a ti.