KHAWTHLIR

Police leh YMA ten May 5, Pathianni tlaia Edenthar Veng, Aizawla in pakhat aṭanga an man, hralh chhâwn tur ni ngeia rin hnam dang kumtlinglo mipa pali leh hmeichhe pariatte chu nimin khan police-te’n thu zawhfiah atan darkar 48 kawl Court-ah an dil. Police hotute hnen aṭanga thu dawn danin, hnam dang 12 an man kaihhnawihah hian mi dang man an la nei lo a, ṭawng lamah inbiakpawh a harsat avangin thu hriat belh mumal an la nei lo. Hnam dangte an manna in neitu Denghliri chu police-in an la kawl mek.Tarlan tawh angin, Denghliri, Edenthar Veng in aṭanga man hnam dang 12-te chuan Bangladesh refugee camp aṭangin Karimganj, Assam-ah hruai an nih hnuah Mizoramah hruai leh an nih thu an sawi. Mizoram aṭang hian Myanmar-a hruai tum an nia hriat a ni.

IPR minister Lalruatkima chuan nimin Treasury Square-a Lianchhiari Run (Multi Facility Centre) sakna tur hmun a tlawh a, sakna tur hmuna la awm Printing & Stationery department chu a theih anga ranga an insawn chhuah theih dan tur a ruahmanpui. Lianchhiari Run sakna tur chu NEC-in April 11, 2017 khan a pawmpui a, a hnu lawkah first instalment cheng nuai 100 a pe a, state matching share cheng nuai 11 pawh Mizoram sorkar­in a pe chhuak tawh. Lianchhiari Runah hian parking, conference hall, mini theatre, art gallery, etc. a awm dawn a ni.

Disaster Management & Rehabilitation minister Lalchamliana chuan nimin khan Mizo Hnam Rûna thu a sawi­­naah, Hunthar Venga lei tlahniam ṭhin siamna atan cheng vbc. 20 vel sênna tur project chu National Disaster Management Authority-in a pawm tawh thu a sawi a, "He lai hmun hi lei min thei tawh lo tur hial khawpa ṭhaa siam theih a châkawm hle a ni," a ti.

Bungtlang Pastor Bial KṬP chuan an bial conference thurel bawhzuiin nimin khan Bung­tlangah blood donation camp an huaihawt a, Serchhip District Hospital tan thisen unit 32 an pe a, a petute mipa 25 leh hmeichhia pasarih an ni.