Ramri buai chinfel ngai pawimawh loah MNF sorkar leh Congress sorkar puh

Zoram Peoples' Movement (ZPM) pisaa nimina inkhawm­ah ZPM vice chairman Lalthansanga (Chátea) chuan thu sawiin, MNF sorkar leh Congress sorkar chhungin Mizo­ram leh Assam ramri buai chinfel nana hmalakna awmze nei a awm ngai lo tih a sawi.

Lalthansanga chuan, chief minister hlui Brig. Thenphunga’n a sawi fo angin, ramriah buaina a lo awmin innêk a ngai ṭhin tih sawiin, "MNF leh Congress sorkarah Mizoram leh Assam ramri buai chinfel nana hmalakna awmze nei a awm ngai lo. Assam lamin ei leh bâr leh kan châkkhai lak luhna min hrêk kan hlauh ṭhin avangin rilṭâm chungin kan huaisen tâwk thei lo a, a dâwih zawkah kan ṭang fo a ni," a ti.

Ramri chingfel turin ei leh barah intodelh a ngaih thu sawiin Chátea chuan, "Hei hi ZPM kan sorkar hunah kan ngai pawimawh hle dawn. Assam ram aṭang chauh ni lo, hmun dang aṭang pawha kan mamawh lak luh theihna tur kan ngaihtuah dawn a ni," a ti a; MNF-te chu an opposition lai chauha ramri buai ngaihsak ṭhin leh an sorkar tawh hnua ramri ngaihthah leh ṭhin an nih thu leh, an rilru tak taka ramri buai vei lo an nih thu a sawi.

Lalthansanga chuan, ZPM chu Mizoram khaichhuahna tura Pathian hruai khawm an nia sawiin, "Pathianin finna min pek hmangin Zoram khaichhuahna tur policy ṭha tak tak kan siam a, inthlan leh huna mipuite'n sorkar siam tura an beisei ber kan nih avangin huaisen takin kan kal zel dawn a ni. Kan sorkar lo hrawn tawh pahnih hian ṭhalaite khawvel min chhawp chhuahsak tak tak dawn lo tih ṭhalaite'n an chiang em em a, ZPM kaihhruai­naah chauh ṭhalaite tan káwl a êng dawn a ni," a ti.