Lirthei luh theih lohna khua 52 a la awm

Economics & Statistics department-in tun hnaia an tihchhuah, Village Profile & Development Indicators 2017-18 Mizoram State-a a lan danin, Mizorama thingtlang khua 673 chu motor kawngin a pawh a, khaw 52 chu lirtheia tlawhpawh theih a la ni lo. Khaw 659-in kawlphetha (electric power supply) an nei tawh.

Village Profile & Development Indicators 2017-18 tarlan danin, Mizorama khua, lirtheiin a tlawhpawh theih 673-te chu khua zawng zawng 725 aṭanga tehin 92.83% a tling a, lirthei tlawhpawh theih loh khua 52 (7.17%) a la awm. Motor kawngpuiin a pawh tawh khua 673 zinga 402-te chu fûr leh ṭhálah lirthei luh theihna khua a ni a, khaw 272 chu ṭhál lai chauha lirthei luh theihna (fûr laia luh theih lohna) a ni thung.

Mizoramah tun hma aṭangin kut hnathawktute an lo/huana an fehna kawng, motor kal theiha siamsak an ni ṭhin a, chutiang chu agriculture link road tih a ni. Agriculture link road laih tawh thui zawng chu km. 6,115 a tling a; mahse, km. 3,516 chiah hman theihin a awm a, km.  2,599 chu laih zawh fel loh leh a ṭhat tâwk loh vangin hman tlak a ni lo. Agriculture link road hi Mizorama khaw 725 zinga 379-in an nei tawh a ni.

Economics & Statistics department survey-a a lan danin, Mizorama khaw 659 chu electric current thlun thlen a ni tawh a, chu chu khaw 725 aṭangin 90.90% a ni. Electric current la luh lohna khua 66 (9.10%) a la awm bawk. Khaw 725 zinga 515 (71.03%)-in water supply public point pakhat leh a aia tam an nei a; khaw dang zawng erawh chu ruahtuiah leh an khaw tui tlanah an innghat. Khaw 130-in vantlang inthiarna (community toilet) an nei a, khaw 528-in vantlang zun-in neiin, khaw 277-in bawlhhlawh paihna hmun (dumping ground) bik an nei a ni.