Bonded warehouse 2 titawp tawh

Mizoram Liquor Prohibition & Control (MLPC) Act hnuaia phalna neia zu dahkhawlna (bonded warehouse) din pathum zinga pahnih chu tihtawp a ni tawh.

Excise & Narcotics department (END) hotute hnen aṭanga Vanglaini thu dawn danin, SS Enterprise Bonded Warehouse leh RTP Bonded Warehouse-ah chuan zu leh thil dang a awm tawh loh avangin April 30, 2019 khan tihtawp a ni. Rafael Enterprise Bonded Warehouse-ah erawh wine a la awm avangin tihtawp a la ni lo.

SS Enterprise leh RTP Bonded Warehouse-te hi security deposit atana an dah Rs. 8,00,000 chu May 2, 2019 khan sorkarin a pe let nghal. MNF-in sorkarna an siam hnuah bonded warehouse neitute Gauhati High Court, Aizawl Bench-ah an zualko avangin ṭum hnih zu zawrh leh a ni.

END leh bonded warehouse neitute hnen aṭanga Vanglaini thu dawn danin, MNF sorkar hnuah zu phurh luh phalna licence pek a ni tawh lo a, a hmaa an lo lak lawk thi tawh tih nun leh hmangin bonded warehouse neitute hian zu an phur lut ṭhin. May 27, 2019 hmaa zu khapna dan Mizoram Liquor Prohibition (MLP) Act hman phal ni lo mah se, sorkarin zu lak luh phalna a pek chhuah tawh loh avangin zu zawrhna dawr (wine shop) pawh inhawng mumal an awm tawh lo.