MLA-in vaimim hmun a enfiah

Tuirial bialtu MLA Andrew H Thangliana chuan May 4, Inrinni khan a bial chhung Khamrang rama vaimim hmun ṭhenkhatah pangang chi khat, fall armyworm puangin vaimim a ei chhiatte a enfiah a, pangang tih­hlumna tur damdawi bûr eng emaw zat a pe nghal.

Andrew H Thangliana chuan, fall armyworm chuan vaimim an duh ber tih sawiin, "Pangang hi a lo puitlin hnuah lungphûrah changin, ni 15 vel lek an dam chhungin tui (egg) sang tam tak an nei hman. Vaimim awm lai a nih chuan vaimimah an tui ber a, vaimim rêm tawh hnuah chuan buh leh thlai dangahte an tui a, an no rawn piang pangangte hi vena khuahkhirh tlat a nih loh chuan thlai leh buh thlengin an ei chhe thei a ni," a ti.