Fall armyworm bei turin Rapid Response Force din - Agriculture Minister

Agriculture minister C Lalrinsanga chuan, tunlaia vaimim ei chhetu pangngang puang mek fall armyworm bei turin Rapid Response Force din a nih thu leh, dam­dawi awm ang ang hmangin Mizoram hmun hrang hrangah fall armyworm vên nan vaimim kah char char a nih thu a sawi.

C Lalrinsanga hian nimina Mizo Hnam Runa MNF ṭhalaite meeting-naah thu sawiin, fall armyworm chu USA lama chetla ṭhin, nikum lama South India-a awm tawh a nih thu a sawi a, "Mizoramah kan lo hmelhriat ve ta a, rannungin a beih ber chu vaimim a ni. Buh a beih tel theih avangin department angin kan rálkhèl a, a beitu pawl Rapid Response Force kan din a ni," a ti.

Fall armyworm bei turin Agriculture department-in theihtawp an chhuah tih sawiin C Lalrinsanga chuan, "Lunglei lamah phei chuan kan office rauhsan ṭhak khawpin kil tin kil tangah an vak chhuak a, chutiang tur pawhin kan inhrilh. DAO hrang hrangah awareness kan inpe a, damdawi pawh a awm thei ang ang kan inthawn a, tunah hian an kâp char char a ni," a ti a; Mizorama fall armyworm puan thu chu sorkar laipuiah an thlen tawh thu a sawi.

Agriculture Minister chuan, fall armyworm a puan ṭan phat aṭangin sorkar laipuiah chhiatna (disaster) thleng thei a nih thu an hriattir nghal tih a sawi a, "Central aṭanga chhawmdawlna awm theih dante ngaihtuahin appeal kan siam a, rannungin a tihchhiat hlut zawngte pawh harsatna tâwkte'n ṭanpuina an hmuh theih nan kan thawn thla a, sorkarin theih ang angin hma a la a ni," a ti. MNYF meeting hi an president Lalrinawma, Assembly deputy speaker pawhin a telpui a ni.