MZP huaihawtin Zoram Ni hman a ni

MZP chuan nimin khan Chanmari YMA Hall-ah Zoram Ni an hmang a; khuallian, minister K Lalrinliana chuan, "Thlawhtheihnain Aizawl a bomb lo ti pawl an la awm leh, MNF-in zalenna a sual lo ti pawl an la awm hi a vanduaithlak a, dâwt an sawi a ni," a ti.

Kum 1966-a Mizoram buai ṭan tirh lam, March 5, 1966-ah India sorkarin jet fighter hmangin Aizawlah bomb an thlâk a, in leh thil dang tam tak a kâng a ni. India-in bomb hmanga Aizawl a beih champha March 5 chu MZP chuan Zoram Ni atan an puang a, kum 2008 aṭangin kum tin an hmang ṭhin.

Minister of state K Lalrinliana chuan, Mizote chu lal neiin kum 200 vel mahnia ro inrèlin an awm a, an ram chin hauhin lu chhum bán chhum an huam ṭhin tih a sawi a; "Kum 1958-a mautàm a lo thlen khan, khatih laia India khan a khua leh tuia min pawm tak tak lohzia a lang chiang hle a, ṭàmpui mitthi kan tawrh lai pawhin India sorkar chuan min ngaihsak lo hle a ni," tiin, chuvang chuan Mizo hnam tan kum 1961-ah MNF din a ni tih a sawi.

Zoram Ni hmannaah hian Prof. JV Hluna'n 'Image on Aizawl Bombing' tih lehkhabu a buatsaih chu MZP president B Vanlaltána'n a tlangzarh a, Zoram Ni hman dan leh a chhante a sawifiah.

Pachhunga University College assistant professor Lal-thlamuana Ralte-in nationalism chungchang a sawi bawk.