Cabinet-in ICFAI zir chiangtu tur a din ICFAI University-a zirlai leh thawktute'n Mizoram suma ICFAI ṭanpui an duh lo

ICFAI University Mizoram, Student Action Committee (SAC) leh ICFAI University Mizoram Employees’ Forum-te chuan, Mizoram sum hmanga ICFAI Society, Hyderabad ṭanpui tumna a awm nia an hriat avangin nimin khan Chief Minister's Office (CMO) luhna gate bulah lungawi lohna an lantir. Hetih lai hian, nimina chief minister Zoramthanga hoa Council of Minister ṭhukhawm chuan ICFAI zir chiangtu tur committee an din.

ICFAI University-a zirlai leh thawktute'n lungawi lohna hrang hrang an neih avang hian May 6, Thawhṭanni khan chief minister Zoramthanga chuan ICFAI University zirlai leh thawktute a kâwm a, chumi hnuah ICFAI Society, Hyderabad hotute a kâwm leh a ni. Chief Minister leh ICFAI Society hotute inkawmnaah hian, Mizoram sum hmanga ICFAI Society ṭanpui tumna a awm niin ICFAI University-a zirlai leh thawktute chuan an hria a ni.

An thu hriat avang hian ICFAI University-a zirlai leh thawktute chuan nimin khan Mizoram sum hmanga ICFAI Society ṭanpui an duh loh thu Chief Minister-ah an thlen a, Chief Minister's Office (CMO) gate bulah pawndum leh lungawi lohna thuziak nen an pungkawm.

Hetih lai hian, nimin zing khan Council of Minister chu CM Zoramthanga hoin CMO Cabinet room-ah an ṭhukhawm a, ICFAI University chungchang an ngaihtuah a ni. Meeting zawhah chief secretary Lalnunmawia Chuaungo chuan thuthar thehdarhtute a kâwm a; ICFAI University Act leh ICFAI University, Mizoramin a harsatna a neih hrang hrangte zir chiang a, rawtna siam turin committee din a nih thu a sawi.

Chief Secretary chuan, committee-ah chuan Mizoram sorkar aiawh, ICFAI General Headquarters aiawh leh ICFAI University, Mizorama thawktute an tel dawn thu a sawi a, "A rang thei ang berin sorkara rawtna siam tura tih an ni," a ti.

Nimin vek khan ICFAI University chancellor JP Rammapa leh society adviser C Dothanga te chuan ICFAI University, Mizoram an tlawh a, zirlaite leh thawktute'n pawndum nen lungawi lohna thuziak kengin an lo hmuak. ICFAI University Chancellor chuan zirlai leh thawktute chu a hmu duh lo a, a tlân tlang a ni.

ICFAI University-a zirlai leh thawktute chuan, Chancellor chu university buaina a hmuna tun hma ang bawka chingfel duh lo leh lungawi lohna thuziak an lo kente chhiarsak duh lo leh ngaihthlaksak duh loa letsanah an puh a, "Kan lungawi lo tak zet a, a ṭul anga na zawka hmalak zel kan tum," an ti.

ICFAI University-a zirlai leh thawktute hian March 28, 2019 khan zirlaite fee tihhniam leh facility ṭha zawk pek phûtin lungawi lohna an lantir tawh a, an hmalaknain awmzia a neih loh avangin April 23 khan lungawi lohna lantir lehin prospectus an hâl. August thlaa semester thar ṭanna tura prospectus siam tawh pawh MZP-te nena ṭangrualin ICFAI Society, Hyderabad hnenah an thawn let a ni.