Zophaia MZP banner târ a bo Bairabi MZP-in FIR an thehlut

MZP Gen.Hqrs. hruaitute'n Bairabi Zophaia Zofate Chawlhbuk an sakna ram chhinchhiahna atana May 6, Thawhṭannia signboard an târ (site banner) chu nimin chawhnua an en leh chuan a bo tawh. Site banner bo chungchangah hian MZP sub-headquarters, Bairabi chuan Bairabi Police Station-ah FIR an thehlut.

Bairabi MZP chuan, "Site banner târ hetia a bo leh mai hi, a la botu a rang thei ang bera zawn chhuah a nih a, hmalak a nih thuai theih nan Bairabi PS-ah FIR kan thehlut nghal a ni," an ti. MZP chuan, "Mizoram chief minister hmasa ber Pu Ch. Chhunga nupui Pi Lalrothangi'n an leilet hmuna Zofate Chawlhbuk sakna atana MZP-te ram a pekah MZP-te'n hma kan lak apianga buaina kan tawk ziah hi hriatthiam har kan ti a ni," an ti a; site banner târ la botu chu zawng chhuak a, an chungah action la ngei turin Mizoram sorkar an phût.

Bairabi MZP chuan, Bairabi Joint V/C kaihhruainaa NGO-te'n MZP-te chawlhbûk sa chhunzawm lo tura ngenna an siam chu zahawm an tih rualin, Mizo ram leh hnam humhimna kawnga ke pên mek chu tàwpsan chi a nih loh thu an sawi a, "Hun lo kal leh zel turah ṭhangtharte'n helai hmun hi an la mamawh dawn chauh a, a bik takin Bairabi khawtlang phei chuan kan la mamawh dawn chauh a ni. Zofate Chawlhbûk sak hi khawngaih taka min dodal lo hrâm turin kan ngen a ni," tiin, Bairabi khawtlang chu MZP hmalakna thláwp zawk turin an ngen a ni.

MZP president L Ramdinliana Renthlei chuan, MZP Gen. Hqrs. chuan Zophaia site banner an târ la botute chu sorkarin man chhuak ngei se an duh thu a sawi a, "MZP banner târ pawh venghim zo lo kan sorkar thuneitute hi kan dem hle. MZP chu a dinna ngaiah a la ding reng a, Zofate Chawlhbuk sak leh a nih theih nan hma kan lak chhunzawm zel dawn. Hma kan lakna kawngah hian sorkar leh Mizo mipuite thlâwpna kan ngen nawn leh a ni," a ti.