Jet Airways tihtàwp rih a nih avangin Mizo ṭhalai 90-110 velin hna an chán

India rama airline lian, Mizoram-ah pawh hun rei tak service tawh Jet Airways chu sum lamah a tlakchhiat avangin tun hnai khan tihtawp a ni a; hei vang hian Mizo ṭhalai 90 aṭanga 110 velin an hna an chân phah a, ṭhenkhatte erawh chuan airline dang an zawm leh tawh.

Jet Airways-a a tàwp thlenga thawk cabin crew K Lalrinfeli chuan Vanglaini zawhna chhangin, Jet Airways a tâwp dawn hnaih vel thleng khan Mizo ṭhalai cabin crew mi 50-70 vel an awma a hriat thu a sawi a, "A tam ber chu hmeichhia an ni a, mipa 2/3 vel an awm ve. Lengpui Airport-ah thawktu ground duty mi 40 vel an awm bawk," a ti.

K Lalrinfeli chuan, Jet Airways a tàwp lai vel thlenga Mizo cabin crew thawk zinga senior berte chu kum 7-8 vel thawk tawh an nih thu a sawi a, "A tam ber chu kum 3-5 thawkte kan ni. Kan company tlakchhiat vanga thawktu hrang hrangin tun thlenga hlawh lâk theih loh kan nei," a ti a, cabin crew hoin hlawh an lak theih loh chu thla 1-3 inkar a nih tlangpui thu a sawi.

K Lalrinfeli sawi danin, sum lama tlakchhiat vanga Jet Airways tihtawp a nih hnuah Mizo ṭhalai 90-110 velin an hna an chán a, mahse, cabin crew zinga ṭhenkhat chu airline dangah cabin crew turin an lut leh tawh. Jet Airways tihtawp a nih hnuah airline dang ṭhenkhat chuan cabin crew lakna (recruitment) an nei a, Jet Airways-a thawk ṭhin ṭhahnem tak chu airline dangah an lut tawh. Mizo nula 10-15 vel Spice Jet-ah an lut tawh a, Mizo nula dang 10-15 vel IndiGo-ah lut tawhin, airline danga lut tlem azawng an awm bawk a ni.

Kum 2014-a Jet Airways-a cabin crew hna thawk ṭan Lalmuanfeli chuan, Jet Airways-in Aizawla cabin crew recruitment an tih hmasak ber ṭuma lut a nih thu a sawi a; amah chu Delhi khawpuia base zinga mi a nih thu sawiin, "Delhi-ah hian Mizo 34 kan awm a, Base dangah chuan mi 20 vel an awm ang. A tlakchhiat tak tak hma khan bâng an tam ve lutuk a, a zat chiah hriat a har," a ti.

Jet Airways-a thawkte hi India rama khawpui lian innghahna bik (base) neia awm an ni a, base pakhata an awmpuite an inhre chiang zual. Khawpui dang base-a awmte nen chuan an inhre chiang vak lo a, chuvang chuan Mizo thawk zat dik tak hriat hleih theih a ni lo. Chutih laiin, pilot Mizo pakhat a awm nia thu dawn a ni.

Cabin crew Mizo nula pakhat chuan, Jet Airways-a cabin crew zawng zawng hmun thuma ṭhena hmun khat vel chu India hmarchhak mite an nih a rinawm thu leh, hmarchhak mi-ah pawh Mizo, Naga leh Manipuri mi an tam zual thu a sawi a ni. 

Jet Airways a tâwp rih tâk chungchangah Lalmuanfeli chuan, "A rilru natthlak lutuk, kan lo hmangaih ve toh em a ni. Mahse, Pathian zarah Mizo ho chu kan vannei zawk. Kohhran mipuite'n min ṭawngṭaipui nasa a, hnam dang, ring lo mi tam tak ai chuan kan tuar thiam zawk," a ti a; hnam dang tam tak chuan chhungkuaa eizawnna pui bera neite an nih avangin an tawrh nat zual thu a sawi.

K Lalrinfeli pawhin Jet Airways tàwp ta mai chuan a rilru a tihnat thu a sawi a, "Jet Airways neitupa hi thinlung takin kan tawrhpui a, hlawh vanga thawk emaw kan intih laiin, chhungkua angin en a lo awl khawp mai. Kan company-in harsatna kan tawh chung­changah thinrimna kan nei lo a, pawi kan ti tak zet a, an hnathawkte kan nih angin, ṭhat lam a pan vat kan beisei," a ti.

Jet Airways hi sum lama an tlakchhiat avang­in kumin kum tîr lam aṭangin India ram hmun ṭhenkhata an service an titawp a, Mizorama an service pawh tihtawp a ni. April 12-ah India ram khawchhak lama thlawk zawng zawng leh international flight zawng zawng tihtawp a ni.

December 2018-ah thlawhna 123 an la thlawh laiin, April 13-ah chuan thlawhna 10 pawh an thlawhtir thei tawh lo. April 17 aṭangin thlawhna an thlawhtir thei tawh lo a, Jet Airways flight hnuhnung ber chu April 18 khan Amritsar aṭangin Mumbai-ah a thlawk. International Air Transport Association (IATA)-a Jet Airways member nihna chu tihtawp rih a ni.