KHAWTHLIR

Lok Sabha MP inthlanpui leh Aizawl West-I MLA by-election neih zawh taka vote tlate chhiar dan tur zirna, ‘Training on counting process’ chu nimin khan Planning department conference hall-ah buatsaih a ni a, chief electoral officer Ashish Kundra-a’n a hmanpui. Training-ah hian returning officer, assistant returning officer, election officer leh district level master trainer-te an tel. Lok Sabha leh MLA by-election-a vote tlate chu May 23, 2019 zing dar 8 aṭangin chhiar ṭan a ni dawn a, counting hall 40 siam a ni ang.

ATMA, Siaha Block chuan pangang chi khat, fall armyworm-in vaimim a ei chhiatsak lo neitute chu tunlai hian khaw hrang hrangah an tlawh kual a, fall armyworm chungchang leh a kahna damdawi hman dan an zirtrir. KVK scientist Rachael Chozah chuan, fall armyworm chuan vaimim bakah thlai dangte pawh a khawih chhe thei tih a sawi a, “Vamim eitu pangang hi rang taka damdawia kah a, vaimim chu enkawl vat a ṭul,” a ti. ATMA, Siaha Block hian khaw pakua an tlawh tawh a, an block huam chhunga an khaw la tlawh lohte tlawh a, loneitute zirtirna pek leh zel an tum.

Lalliansanga (55), Bualpui Hmarveng, Kolasib district chu nimin zing khan an riahna Chemlui kamah a thi a, chumi kaih­hnawihah chuan rama a riahpuite police-in an la. Thu dawn danin, Lalliansanga hi a ṭhiante pali nen thing zaiin mi thlámah an riak a, an riahpui zinga miin May 5, Pathianni zan khan kut a thlak niin an sawi. Thawhṭanni zing dar 4 vela kaihthawh an tum chuan Lalliansanga chu a lo thi tawh a ni.

Traffic SP chuan thupek chhuahin, Ramhlun North, Tlaklui kawng leh Bawngkawn South aṭanga Bawngkawn tlan chhuahna kawngah lirthei LMV chin chung lamte dar 8:30 - 10:30 a.m. leh 4:00 - 6:00 p.m. inkara Bawngkawn lam pana tlân khapna thupek chhuah tawh chu sût a ni a, a hmaa lirthei tlan dan ṭhin angin tlan leh theih a nih tawh thu a tarlang.