SAI naupangte'n enkawlna ṭha an dawng lo An chanvo ang pe turin thuneitute an ngen

Sports Authority of India (SAI), Aizawl centre-a awm mekte chuan, an chanvo tur tam tak an chang lo a, enkawl an nih dan a chhe hle tih an puang a; an chanvo tur ang tak pe turin SAI thuneitute an phût a, Mizoram sawrkar chu hmalakpui turin an ngen bawk.

Dinhmun ṭha lo taka an awm chung­changah SAI hostel, Mission Vengthlanga awmte chuan nimin khan Aizawl Press Club-ah thuthar thehdarhtute an kâwm a; enkawlna ṭha an dawng lo tih sawiin, "Kan beidawng em em a, kan beidawn tawpah media-ah kan kal ta a ni a, tun hi kan beiseina hnuhnung a ni," an ti.

An sawi danin, SAI, Aizawlah hian sport discipline pasarih - boxing, judo, karate, sepak takraw, taekwondo, weightlifting leh wrestling zir mek mipa leh hmeichhia 67 an awm mek a, kum 14-21 inkarte niin, an tlem lai a ni. Mizoram aiawha chhuak ṭhin te, a ṭhen phei chu India ram aiawha chhuak ṭhinte an ni. Hostel-a awmchilha enkawltute chu centre incharge pakhat, coach pahnih leh warden pahnih an ni a, chaw chhumtu pathum an awm bawk.

SAI hosteller-te chuan, tui in tur thiang­hlim an tlâkchham fo thu leh ni hnih/thumte tui in tur nghei cháng an neih thu an sawi a, tui connection pali nei mahse tui a haw ṭhat loh lutuk avangin tui an indaih lo hle a, ni tin zing leh tlaia practice ṭhin an nih avangin tui an nei ṭha lo chu an harsatna lian tak a nih thu an sawi. "Tui harsat thu vawi tam tak in-charge leh warden hnenah kan thlen ṭhin a, awmzia awm ngai lo," an ti.

SAI-a awmte chu infiammi an nih angin ei leh in turah ṭha taka enkawl tur an nih laiin, ei leh in an dawng chhe hle tih an sawi a, "Thei (fruit) ni tin dawng tur kan nih laiin kar khatah vawi khat - Pathianniah chiah min pe a, min pek chhunah pawh a ṭawih a tam hle a ni," an ti a; sa pawh tlai khata mi 70 vel ei atan kg. 4-7 te an dawn thu an sawi.

SAI hostel-a awm zingah zirlai, sikul kal lai an awm nual thu sawiin, chungte chuan harsatna an tawh nasat thu an sawi a, "Hostel a hlat avangin zingah practice zawhah hostel-a chaw ei turin an haw hman lo a, chaw ei loin gym aṭangin sikul an pan ṭhin. Tlaiah gym-ah paractice leh nghal a ngai ṭhin a ni," an ti a; sikul kal lai bikte chu tiffin paitir turin thuneitute an ngen.

SAI hosteller-te chuan, kawng hrang hranga harsatna an neihte chu kum 2016 aṭanga centre in-charge atana Manmohan Singh a awm aṭanga inṭan a nih thu an sawi a, "Bialtu MLA (Aizawl West-III) pawhin tun hnaiah min rawn tlawh a, enkawl kan nih danah a lungawi bik lo hle a, thuneitute hnenah a thlen dawn thu a sawi," an ti.

•    Thim thlengin kan practice ṭhin a, hostel leh gym inkar hi km. 2 vela hlá a ni a, ramhnuai kawngah thimthamah kal a ngai ṭhin a, hmeichhia leh naupang zual deuh tan a him lo hle. Hostel kawngah hian a khát tâwka street light dah a ṭul.

•    Kum tin sport bungrua a ṭha thei ang ber dawng tur kan nih laiin, sport goods kan dawn tur angte kan dawn lohna a rei tawh.

•    Hostel leh gym-ah hun rei tak chhung first-aid a awm tawh lo ve ve a, ice pack tak ngial pawh a awm lo. Inhliam chángte kan nei a, inenkawlna mahnia inngaihtuah vek a ngai.

•    Taekwondo leh wrestling bik phei chuan kum 2016 aṭangin coach an nei tawh lo a, coach dah turin naupangte'n kan dil ṭhin a, 'Kan ngaihtuah ang' tih bak chhanna a takin kan la hmu lo. Tunah chuan senior zawkte'n an thiam ang angin an naute an zirtir ṭhin a ni.

•    Ei leh ina an dawn tur chin an hriat ve theih nan food chart târ turin hotute an ngen ṭhin a, tun thlengin târ a la ni lo. Eng emaw chángin an sa dawnah a uih tawhte a awm.