Congress ṭhalaiin Agriculture Minister inthlahdahah an puh

Congress party ṭha­laite chuan thu­chhuah ­siamin, Mizorama vaimim ei chhetu pangang, fall armyworm puang chungchangah Agriculture minister C Lalrinsanga chu inthlahdahah an puh.

Mizoram Pradesh Youth Congress Committee (MPYCC) chuan, "Mizoram chauh ni lo, India ram state hrang hrang­a lo neitute thawh rah rûn mek­tu fall armyworm puan tur thu Mizoram sorkar hnena hriattir lâwk a nih vek hnuah Agriculture minister C Lalrinsanga inthlahdah vangin inven lâwkna pakhatmah neih a ni lo a, Mizoram lo neitute'n nasa takin an tawrh phah. Minister hian sorkar 'honeymoon' hun a hmang rei lutuk a, lo neitute manganna khur­ah a hnûk lût a ni," a ti.

MPYCC tarlan danin, fall armyworm hi Africa khawmualpuiah economy tichhe khawpin a puang tawh a, kum 2016-17 ah India ramah a darh ṭan bawk a; Mizoramah pawh February 2019-ah inring lâwk tura hriattirna dawn a ni tawh.

Inring lâwk tura hriat­tirna kumin February thlaah dawn a nih tawh laiin Agriculture minister C Lalrinsanga'n mipui hnenah hriattirna leh inrin lâwkna a pe chhuak lo nia sawiin MPYCC chuan, "A khawih chhiat theih thlai chîn loh tur chi puanzarna a nei lo hi a vanduaithlak kan ti. Agriculture Minister hian vawiin thlenga a department officer-te thlai chîn dan tur cropping programme a la siampui lo hian kut hnathawktute an hlamchhiahzia a tarlang," an ti.

MPYCC chuan, "Kum­in February thla daih tawhah fall armyworm vangin Mizoramin harsatna a tâwk dawn tih hre tawhin, thla thum hnua Rapid Response Force a din chauh a, 'Central-ah kan appeal' tia sawi­tu Agriculture Minister hian kut hnathawktute a hmusit­in a endawng hle a ni," an ti a; Mizoram sorkar chu lo neitute mang­anna a takin an kutzála dah a, emergency puanga buaipui turin an phût a ni.