MSU-in MSSSB Chairman atana ruat Office zawm lo turin an ngen

Mizo Students' Union (MSU) General Headquarters hruaitute chuan nimin khan Aizawl Press Club-ah thuthar thehdarhtute an kâwm a; Mizoram Subordinate Ser­vice Selection Board (MSSSB) chairman atana ruat Lalrammawia chu office zawm lo turin an ngen tih an puang.

MSU president Vanlal­liana Khiangte chuan, Mizoram sorkarin MSSSB dinna tur June 12, 2019-a a pass aṭangin an thlithlai reng tih sawiin, "June 12, 2019 khan press release siamin Mizoram sum leh pai dinhmun ngaihtuah chungin MSSSB din kher aia MPSC tihlen pawh a ṭha zawka kan ngaih thu kan lo tarlang tawh a ni," a ti.

Vanlalliana Khiangte chuan, MSSSB din a nih tâkah chuan Mizo ṭhalai hna zawng mek leh zirlaite hmakhua ngaia party induh­sakna hleihluak a awm lohna turin Board enkawltu ruat kawngah sorkar chu fimkhur taka kal turin MSU-in an ngen tih a sawi a; chuti chunga political party adviser ṭhin chairman atana ruat a ni chu an hriatthiam loh thu a sawi a ni.

MSU President chuan, sorkarin MPSC enkawl tura party mi an dah ṭhin avangin party mi leh sa aṭangin induhsakna kawngah innawrna a awm ṭhin tih sawiin, "Chu chuan ṭhalai hna zawng mek leh zirlaite a tihhnual ṭhin avangin kan duh lo tak zet. MSSSB-ah chuan ṭhalaite leh zirlaite hlauhthawnna thil a awm loh nan vawi tam tak MSU chuan sorkarah ngenna kan siam tawh a ni," a ti.

Mizo ṭhalai hna zawng mekte ngaihtuahin MSSSB din puitling vat turin July 2019-ah sorkar an ngen thu sawiin Vanlalliana chuan, "A puitlinna tura hmalakna hmasa bera political party-a nihna nei ṭhin ruat a ni ta mai hian ṭhalai hna zawng mek leh zirlaite rilruah party mi leh sa induhsak bikna a awm thei mai ang tih hlauhthawnna awm sa chu a inmung thar a ni," a ti a; sorkar chu ṭhalaite ngaih­thahah an ngaih thu a sawi.

Vanlalliana Khiangte chuan, Mizo ṭhalai leh zirlaite thlavâng hauhin a tàwp thlenga kal an tum thu sawiin, "MSSSB chairman atana ruat thar hi Mizo ṭhalai hna zawng mek leh zirlaite hlauhthawnna tireh turin a office zawm lo turin kan ngen a ni. MSU-in zirlai leh ṭhalai hna zawng mekte aiawha a ngenna hian awmzia a neih theih nana kan hmalakna kawngah Mizo mipuite thlàwpna kan ngen nghal a ni," a ti.