Aizawlah Arogya Mela ṭan a ni

Sorkar laipuia AYUSH ministry bultumin nimin khan Dawrpui Multipurpose Centre-ah Arogya Mela (Health Fair) vawi ngana buatsaih ṭan a ni a, Governor PS Sree­dharan Pillai-a'n a hawng. AYUSH damdawi hmang­a inenkawlna leh inzirtirna hun hi vawiin leh naktukah chhunzawm a ni ang.

Governor chuan, India ram state lian zawkah chuan AYUSH damdawi an hman nasat thu leh Prime Minister pawhin theih­tawp chhuaha a tihlâr thu a sawi a, "Mizoramah AYUSH damdawi hmanga hriselna kawnga hmalaknaah theihtawp kan chhuah ang a, Mizo mipuite'n AYUSH damdawi an hman ṭangkai a ngai," a ti.

Hawnna inkhawma khualzahawm, Health minister Dr R Lalthangliana chuan, "Pathianin kan rama ramhnim damdawi ṭha tak tak a dahte hai chhuak turin district tinah awareness neih a pawimawh. Arogya Mela hi chumi atana programme pawimawh tak a ni," a ti a; India rama medicinal plant (ramhmul damdawi) lama pakhatna ni thei tura project a thehluhte a hlawhtlin theih nana AYUSH Ministry-ah rawtna a thlen thu a sawi.

Health Fair-ah hian stall 19 hawn a ni a, Ministry of AYUSH aṭangin council pasarih leh Mizoram chhung aṭangin mimal leh department hrang hrang 12-in an thil siam chhuah leh ramhmul damdawi hrang hrangte an pho chhuak a ni. Mela pual hian nimin zing khan Aizawl FC leh Mizoram Badminton Association-te nen 'Walkathon' an nei bawk. Arogya Mela-ah hian vawiin leh nak­tukah a thlawna inentirna buatsaih a ni dawn a, AYUSH doctor-te'n damlote an en ang a, damdawi a thlawna sem nghal a ni ang.