Champhai leh Hnahthialah Handloom Expo
Mizoram Apex Handloom & Cooperative Society Ltd. (MAHCO) leh Zoram Handloom and Handicraft Development Corporation Ltd. (ZOHANDCO)-te chuan Champhai leh Hnahthialah Chapchar Kût 2020 pualin Special Handloom Expo 2020 an buatsaih mek.
Champhai Kahrawt Veng community hall-a Handloom Expo neih mek chu sorkar laipuia Ministry of Textiles hnuaia Development Commissioner for Handlooms leh MAHCO-te'n an buatsaih a ni a, March 4 khan Cooperation-a additional registrar Lalrinsanga'n a hawng. Expo-ah hian Mizo puantah, incheina leh hnam thuam hrang hrang zawrhna stall 25 siam a ni.
Hnahthiala Special Handloom Expo chu ZOHANDCO buatsaih a ni a, Bazar building-ah neih niin, Industrial Development Board vice chairman C Ramhluna'n a hawng. He Expo-ah hian stall 29 a awm. Mizoramah handloom cluster 10 a awm mek a; Mizo puan panga - Puanchei, Ngotekherh, Pawndum, Hmàrám leh Tawlhlohpuante chu Mizote'n dan ang takin a neitu nihna a nei tawh a; Puanchei leh Tawlhlohpuante chu August 16, 2019-ah Geographical Indication (GI) tag/registration tih a ni a, Ngotekherh, Pawndum leh Hmàrámte chu August 22, 2019-ah GI tag/register tih leh a ni bawk.