AR la chhuak lo MPCC-in pawi an ti

Mizoram Pradesh Cong­ress Committee (MPCC) chuan thu­chhuah siamin, chief minister Zoram­thanga'n, Assam Rifles hoin Aizawl khawpui laili an chhuahsan tur thu a sawi aṭanga kum khatah pawh an la chhuak lo a, AR sipaite nen inchiahpiah taka Chapchar Kût a la ni ta zel chu pawi an tih thu an tarlang.

MPCC chuan, Chapchar Kut 2019-a Lammuala Chapchar Kût hmannaah kûtpa CM Zoramthanga’n, hun rei lo te chhungin AR sipaite'n Aizawl khawpui an chhuahsan tur thu sawiin, "Kût hmanna Lammual kan tih ṭhin hi AR hnen aṭanga kan hman hawh a la ni a, amaherawhchu, May thla hnu aṭang chuan heng ram, heng hmun zawng zawng hi kan ta a ni tawh dawn a ni, tiin a sawi a. A sawi champha a lo thlenah pawh Lammuala AR hote nena inchiahpiah taka Chapchar Kût kan la hmang ta zel mai hi pawi kan ti tak zet a ni," an ti.

Assam Rifles-te Aizawl khawpui laili aṭanga sawn chhuahna tur order, Home Ministry aṭanga chhuak tawh si leh Chief Minister meuhin an chhuah hun tur chiang taka a sawi chunga kum khat hnuah pawh an la nawr chhuak thei lo chu mak an tih thu sawiin MPCC chuan, "Dâwt thu hmanga Zoram mipuite bumna lian takah kan ngai," an ti a; Chief Minister chu a tih theih loh tur thil sawi lâwk tawh lo tur leh dâwt thu hmanga mipui bum fo tawh lo turin an ngen a ni. Congress party chuan, Mizoram mipuite Chapchar Kût chibai an bûk tih an tarlang bawk.