Vanglaini logo

PMJVK hnuaiah Chief Minister biala Hma la tura dilna CMO-in an thlen

Nimin Assembly session-ah ZPM member Dr Vanlalthlana chuan, Pradhan Mantri Jan Vikas Karyakram (PMJVK) hnuaiah chief minister Zoramthanga bial, Aizawl East-I ah hma la tura dilna Chief Minister's Office (CMO)-in an thlen thu a sawi. Hetih lai hian, PMJVK hmanga Mizorama hmalakna tura tihte chu Lunglei, Mamit leh Lawngtlai district-a RD block pasarih a ni.

Dr Vanlalthlana chuan, PMJVK hnuaiah Aizawl East-I biala hma la tura ngenna lut a hriat­pui leh hriatpui loh PMJVK nodal department District Coun­cil Affairs & Minority (DCAM) minister R Lalzirliana a zawt a; DCMA Minister chuan, PMJVK hnuaiah Aizawl East-I bialah hna thawh theih a nih loh thuin a chháng. 

Aizawl East-I bial atan PMVKY hnuaia hma la tura ngenna CMO aṭangin DO letter hmangin a kal thu sawiin Dr Vanlalthlana chuan, "Zemabawk North High School atan cheng nuai 561.25 dil a ni," a ti a; a kaihhnawih (DCMA) Minister-in a hriatpui ve lo a nih theih thu a sawi.

R Lalzirliana chuan, PMJVK hnuaiah hian kum 2020-21 chhungin project eng emaw zat atan sanction dawn a nih thu sawiin, "Amaherawhchu, 29th Empowered Committee Meeting-in 2020-21 last quarter chhunga pawisa awm dana sanction pek tur a tih project atan chuan Mizoram sorkarin sanction a la dawng lo," a ti. 

DCMA Minister tarlan danin, PMJVK hnuaia sum hmuhte chu district headquarters pathum - Lunglei, Mamit leh Lawng­tlai district bakah, district pathuma RD block pasarih - West Bunghmun, Lungsen, Zawlnuam, West Phaileng, Lawngtlai, Bungtlang South leh Chawngte block-ahte hman tur a ni.

Dr Vanlalthlana'n PMJVK atana state matching share (SMS) dah a nih loh thu a sawi chungchangah R Lalzirliana chuan, "SMS chu Finance department-ah kan mamawh ang zelin kan dil a, hmuh loh kan nei lo," a ti a, kuminah cheng nuai 10,000 chuang an dawn thu a sawi.

R Lalzirliana chuan, PMVKY hnuaia DPR chu department siam a nih loh thu a sawi a; chumi chungchanga INC member Zodintluanga Ralte zawhna chhángin, "Mizoram State Sports Council siam a ni a, department an ni lo," a ti.