COVID-19: Mizoram dinhmun Hripui vei mi 1 hmuh belh a ni
March 14, Pathianni khan Mizoramah Covid-19 vei mi pakhat hmuh chhuah a ni a, nimin khan hripui laka fihlim tawh mi pakhat chu SRH-ZMC aṭangin chhuahtir a ni.
Covid vei Pathiannia hmuh thar chu Rapid Antigen Test hmanga hmuh chhuah a ni a, Siaha New Colony venga hmeichhia kum 35 mi, Aizawla a kal dawn vanga swab sample endik a ni. Hri a kàina hriat a ni lo a, symptom a nei lo.
Mizoramah Covid-19 vei mi 4,437 hmuh chhuah a ni tawh a, mipa 3,236 leh hmeichhia 1,201 an ni. Nimin tlai dar 5 thleng khan mi 4,417 (99.55%) chhuahtir an ni tawh a, mi 10 (0.23%) thi tawhin, enkawl mek mi 10 (0.22%) an awm.
Mizoramah March 14, Pathianni khan TrueNAT-PCR hmangin Siahaah sample pathum leh RAT hmangin district paliah sample 207 endik a ni a, ZMC laboratory-ah sample endik a ni lo. Sample endik zawng zawng chu 210 niin, chu'ng aṭanga Covid-19 positive hmuh chhuah pakhat chu 0.47% a ni.
March 14, 2021 thlenga Mizorama swab sample endik tawh zat chu 2,42,541 a ni a, chu'ng aṭanga Covid-19 positive hmuh tawh zat 4,437 chu 1.83% a ni. Hripui vei hmuh tawh zinga mi 2,119 chu Mizoram chhunga kái chhâwng an ni a, mi 2,318 chu Mizoram páwn aṭanga an rawn luh hnua hmuh chhuah an ni thung.
Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a, chumi hnua hmuh chhuah leh hmasak ber chu June 1, 2020-ah niin, ZMC laboratory-ah hmuh chhuah a ni. ZMC-ah hian Covid-19 positive 2,657 hmuh chhuah a ni tawh a, TrueNAT-PCR hmangin 674 leh RAT hmangin 1,105 hmuh chhuah a ni tawh.
Tun dinhmunah Mizorama district 11 zinga pariat - Lunglei, Kolasib, Serchhip, Lawngtlai, Mamit, Khawzawl leh Hnahthial district-ahte Covid-19 vei an awm tawh rih lo.