Chhantea'n Darlawn haw rûnpui a hmanpui

Darlawn khua chuan nimin khan an khaw khelmualah 'Haw rûnpui' an hmang a, bialtu MLA Lalchhandama Ralte, School Education minister-in hmanpuiin, Darlawn Helipad siam thar chu a hawng nghal. Helipad hi Rs. 8,70,000 sénga siam a ni.

Lalchhandama Ralte chuan, thingtlang khaw tam tak a zuih zawnga an kal laia Darlawn khuain kum 118 hnuah hmar tlangdunga khaw lian ber a ni thei chu lawmawm a tih thu a sawi a; hmasawnna innghahna chu zirna a nih avangin, ṭhalaite chu ruihhlo lama tlân lo a, zirna kawngah ṭhahnemngai turin a chah.

Hmar tlangdungin hmasawn turin zirna bakah kawngpui ṭha a mamawh tih sawiin Lal­chhandama chuan, "Manipur lam kalpawhna te, Bagha kalpawhnate sorkarin a buaipui mek a, Darlawn hi sumdawnna hmunpui a nih theih nan ngaihtuahna kan lo hman lâwk a ngai," a ti a; Darlawn mipui chu khawtlang hmasawnna kawngah kawng dik zawh turin a fuih. Darlawn haw rûnpuiah hian Aizawl leh khaw hrang hrang aṭangin mi 700 chuang an haw a, Darlawn khaw mi chawimawi phûa an ngaih mi 123 hnenah chawimawina hlan a ni a, tlaiah ruai an ṭheh. Darlawn hi kum 118-a upa a ni.