Mizoram sorkar hnuaiah Post ruak 14,436 a awm

Department of Personnel and Admi­nis­trative Reforms (DPAR) changtu deputy chief minister Tawnluia chuan, Mizoram sorkar hnuaiah sanction post 44,500 a awm a, chu'ng zinga 14,536 chu hnawhkhah loh a nih thu Assembly House a hrilh.

MNF member Dr Vanlalṭanpuia zawhna chhangin Deputy Chief Minister chuan, Mizo­ram sorkar hnuaiah a ngheta thawk mi 28,654, contract-a thawk mi 317 leh thawktu dang 993 an awm thu a sawi a, "Sanction post 44,500 awmin, hnawhkhah loh 14,536 a awm. Sum dinhmunin a zir a nih chuan mamawhnaah chuan direct recruitment tih hi sorkar kalphung a ni," a ti.

Tawnluia chuan, Mizoramah IAS cadre post 32 a awm thu sawiin, "Tunah hian IAS thawk lai 22 an awm. MCS cadre post 234 kan nei a, thawk lai 186 kan nei. Deputation-a kal mi 20-30 an awm reng a, kan indaih lo hle; vacant post (post ruak) 80-90 vel a awm. IAS leh MCS cadre hi awm mah se, IAS indaih lohna avangin inkal thelh chin a awm lo thei lo," a ti a; February 2021-a Mizo IAS panga châwl (pension)-te hmun hnawhkhahna tur leh Mizote kàisanna turin MHA-ah dilna an thehluh mek thu a sawi.

Deputy CM sawi danin, tunlai hian MPSC kaltlangin Combined Competitive Examination buatsaih tuma hmalak mek niin, advertisement chhuah a ni a, kuminah exam neih tum a ni. Combined exam-ah hian MCS, MPS leh MFAS pariat ṭheuh leh MIS pali lak tum a ni.

Tawnluia chuan, department hnuaia post ruak, a bikin promotion quota leh limited depart­ment examination quota chu hnawhkhah reng a nih thu a sawi a, "Amah­erawhchu, direct recruitment quota bik erawh hi chu sorkar sum leh pai dinmun leh department-in an mamawh thlir chung zelin a ṭul anga hnawhkhah ṭhin a ni," a ti.