Min campaign saktu an tam - Lalduhoma

ZPM leader Lalduh­oma chuan nimin khan an party pisaa inkhawmah thu sawiin, Assembly by-election neihna tur Serchhip bialah an party an insawh ngheh tawh thu leh páwn lam aṭanga campaign saktu an tam thu a sawi.

Lalduhoma chuan, Assembly budget session neih mekin Serchhip bial mipui a tiharh tih sawiin, "Serchhipa kan dinhmun thlirin, party a insawh nghet tawh hle a, páwn lam aṭanga min campaign saktu an tam em em a, kan lawm tak zet a ni," a ti.

ZPM Leader chuan, "Kan khingpui turte hian engtiang takin nge sum leh pai an chelek dawn hriat a ni lo a, keini chuan Pathiana innghat chungin theihtawp kan chhuah zel ang," a ti a; campaign hawnna hun la hman tur a nih thu leh campaign hawn hnuah chuan nasa lehzuala an ṭan tlân a ngaih dawn thu a sawi.

ZPM vice president Dr Kenneth Chawngliana chuan, ZPM-ah a thawk nasa apiang neitu an nih thu sawiin, an party zawm tharte chu kalphung thar hnuaiah rim taka thawka ram kaihruai turin a lawm lut tih a sawi a ni.

ZPM thuchhuah chuan, nimina inkhawm­ah hian Aizawla veng hrang hrang aṭanga an party zawm thar mi 134-te ZPM-ah lawm luh an nih thu a tarlang.