Myanmar ráltlân rawn lut an pung zel - Ráltlân rawn lut zat hriat theih a ni lo

Myanmar sipaite'n mipui thlan sorkar an paihthlak avanga an ram chhunga buaina punlun zel avangin sahimna zawnga Mizorama rawn lut pawh an pung tial tial a, mi za chuang fê an rawn lut tawha thu dawn a ni.

Myanmar aṭanga Mizorama raltlânte'n an belh hmasak berte zinga mi, Serchhip district-a Lungkawlh khuaah chuan luh belh an awm tawh rih lo a; mi 19 lut tawh zinga mi 16 an la awm mek a, mi pathum chu North Vanlai­phai lamah an insawn tawh.

Lungkawlh khawtlang hruaitute chuan, Serchhip DC pisaa an lên ṭuma DC-in Rs. 8,000 a lo pek bak chu raltlânte chhawmdawlna leh enkawlna turin sorkar aṭangin dawn an la neih loh thu an sawi a; ei leh in atan khawtlang mipuiin sum leh thil dangte an thawh khawm tawh thu an sawi. 

Farkawn khawtlang hruaitute chuan an khuaah Myanmar raltlân eng emaw zat an luh tawh thu an sawi a; chutih rualin, khawtlang rorelnain an dinhmun puanzar loh an tih avangin ráltlân awm zat leh an dinhmun tak tak an sawi thei lo thung.

Vaphai khuaah Myanmar ráltlân mi 30 vel an luh tawh thu Vaphai khawtlang hruaitute chuan sawiin, an vaiin Myanmar police vek an nih thu an sawi a, "A tirah chuan anmahni an rawn lut phawt a, ṭhenkhat chuan a hnuah an nupui fanaute an han hruai leh hlawm," an ti.

Ráltlânte chu hmanhmawh tak leh hlauhlawpa rawn tlânchhia an nih angin uniform nen an khuaah an lut tih sawiin Vaphai khawtlang hruaitute chuan, "A tam zawk chuan pawisa pawh an rawn keng lo a, keini'n Mizo mikhual inthlen dan angin mimal inah kan lo thleng a, chhungkaw tam tak chuan pawisate pawh an pài a ni," an ti a; Vaphaia lut tam zawk chu hun rei vak lo an khuaa an awm hnuah Champhai leh khaw dang ṭhenkhat an pan leh thu an sawi. 

Vaphai khawtlang hruaitute chuan, an khuaah aiin an ṭhenawm Farkawnah remchanna zawk avangin raltlan an lut tam zawk tura an ngaih thu an sawi bawk.

Myanmar aṭanga Mizorama ráltlân lut zat, an awm dan leh an dinhmun dik tak hriat theih a ni rih lo a; Champhaiah lut an awm nual tawh bakah, khaw dang ṭhenkhatah pawh lut an awm an rin thu, Mizoram khawchhak lama khawtlang hruaitute chuan an sawi a ni.