Myanmar buaina Vice President-ah thlen

Rajya Sabha MP K Vanlalvena chuan nimin khan Vice President M Venkaiah Naidu, Rajya Sabha chairman ni bawk chu a chênna hmunah a hmu a, Myanmar rama democracy tun din tuma hma latute chunga tawrhna nasa tak thleng chungchang leh Mizoram mamawhte a sawipui. 

K Vanlalvena hi MNF adviser Rosangzuala'n a ṭawiawm a; Myanmar ram buaina avanga sipai kut tuara thi leh hliam tam tak an awm tawh thu leh a zat dik tak hriat theih a nih loh thu te, an la pung zel dawna a lan thu te, mi tam tak tàntir mek an nih thute sawiin, Myanmar sipai leh police zinga eng emaw zat chuan civil mi dangte nen inhumhimna zawngin Mizoramah an luh tawh thu an hrilh. Raltlan Mizorama lutte chhawmdawlna tur ngaihtuah a ṭul thu an sawi bawk. 

Myanmar mipui tawrhna titawp tura a ṭul dan anga hma la turin Vice President chu an ngen a; Myanmar laka sorkar laipui policy chu ennawn ṭula an hriat thu an thlen a ni. 

India-in zalenna a hmuh hnuah Union Public Service Commission (UPSC) member-ah Mizoram mi an la awm ngai loh avangin Mizo an awm ve theih nan hma lakpui turin Vice President an ngen. All India civil service-ah Mizoram cadre hranpa siam a nih theih nan leh Staff Selection Commission exam centre Aizawla dah a nih theih nan hma lakpui turin an ngen bawk.