KHAWTHLIR

Horticulture changtu chief minister Zoramthanga chuan ZPM member Dr Vanlalthlana zawhna chhangin, Mizoram Bamboo Policy siam tum a nih thu a tarlang. Chief Minister chuan, mau/rua tihpunna atan Tissue Culture Laboratory din tumna a awm leh awm loh zawhna chhangin, "Department level aṭang chuan mau/rua tihpunna atan Tissue Culture Laboratory din tumna emaw, ruahmanna a awm rih lo," a ti.

AH&Vety minister Dr K Beichhua chuan MNF member Zothantluanga zawhna chhangin, state páwn aṭanga vawk lak luh kap a la nih thu a tarlang a, "A chhan chu kan ṭhenawm state - Assam, Arunachal Pradesh, Meghalaya leh Manipur bakah ṭhenawm ram Myanmar-te African Swine Fever-ah an la fihlim loh vang a ni," a ti. 

State Referral Hospital (SRH)-ah Covid-19 hripui vei mi pasarih enkawl mek an ni a, an vaiin Isolation ward-ah awmin, harsatna lian tham nei an awm lo. SRH aṭang hian hripui laka fihlim tawh mi pakhat chu nimin khan chhuahtir a ni.

Nimin khan Aijal Club-ah Schedule of Rates (SoR) zirhona neih a ni a, Rural Development (RD) minister Lalruatkima'n a hmanpui. SoR hi Mizorama MGNREGS hnuaia hna chi hrang hrang thawhnaa hman tur a ni a; job card neitute hriselna, kum zat leh an taksa dinhmun aṭanga tehin hnathawhna tur rate bithliah niin, April 2021-ah hman ṭan a ni ang.

Indian Council of Agricultural Research (ICAR), Kolasib chuan nimin khan thuchhuah siamin, tun hnaiah ICAR, Kolasib hmingin social media hrang hrangah thu dik lo thehdarh a nih thu an tarlang a; "Kan state chhehvelah vawk natna léng vel a awm reng avangin fimkhur a ṭul a, amaherawhchu, ICAR Kolasib hminga mipui tirálkhèl zawnga thuchhuah belhchian dâwl lo thehdarh a ni hi a pawi tak zet a ni," an ti.