Mizo duh danin ramri la chingfel lo; CM-in ramri chinfel dan a hriat Home-in a hriatpui lo - Home Minister

Home minister Lalchamliana chuan INC member pahnih Zodintluanga Ralte leh KT Rokhaw-te zawhna ziaka chhangin, Mizote duh dan angin ramri chinfel a la nih loh thu a tarlang. INC member C Ngunlianchunga zawhna chhángin, Chief Minister-in ramri chinfel dan a hriat chu Home department-in a hriatpui lo tih a tarlang bawk.

Home Minister chuan, "Mizoram leh Assam ramri buai hi Mizote duh dana chinfel a la ni lo. Mizoram leh Assam ramrîah hian state pahnih ngaihdan leh pawm dan a inang lo a, central sorkar pawhin a hria. State pahnihte ramri chinfel a nih theihna atan central sorkarin hma a la mek. Engtikah nge chinfel a nih ang tih sawi theih a ni lo," a ti.

C Ngunlianchunga zawhna, 'Kan Chief Minister zahawm takin Mizoram ramri buai chinfel dan a hriat hi Home department hian a hriatpui tawh em? A hriatpui chuan CM ramri buai chinfel dan hriat hmang chuan chinfel thuai theih a ni dawn em?' tih chu Lalchamliana chuan, "Hriatpui lo. Kan hriatpui loh avangin chinfel thuai theih nan hman theih a nih leh nih loh hriat a ni lo," tiin a chháng a ni.

•    Mizoram leh Assam ramri buai chinfel a nih theih nana Mizorama páwl hrang hrang intêlkhawmna Joint Action Committee on Inner Line Forest Demand-te'n boundary commission an din bakah, Inner Line Reserved Forest, sq. miles 509-a zau chu a pumpuia Mizoram sorkar kuta hlân lêt tura ngenna Prime Minister hnena an thehluh chu Mizoram sorkar chuan a thlàwp thu Home department hmangin Ministry of Home Affairs-ah a hriattir.

•    Ministry of Home Affairs hmanga hriattirna dawn bawhzuiin Mizoram leh Assam ramri buai chungchanga indawrna neihna atan nodal officer ruat a ni.

•    MHA-in Mizoram leh Assam ramri buai zir chiang tura nodal officer a ruat joint secretary Manish Tiwari chu ni 28.12.2020 khan CS conference hall-ah meeting neihpui a ni.