Bairabi-Zamuang kawng siam mek HCDC-in a ṭha tâwk loah an ngai

Hachhek Constituency Development Committee (HCDC) chuan, an bial chhunga sorkar hmalakna ṭhenkhat chu lawmawm an tih rualin, Bairabi-Zamuang kawng siam mekin duhthu a sam loh thu an tarlang.

HCDC chuan, kar liam ta khan an bial chhunga sorkar hmalakna ṭhenkhat an tlawh kual tih sawiin, "Hnathawh ṭha tak tak a awm hi lawmawm kan ti a, sorkarin min ngaihsaknaah lawmthu kan sawi a, ṭha taka thawh a nih zel kan beisei," an ti.

Bairabi-Zamuang kawng blacktop mek erawh chu an thawh muan bakah a ṭha tawk lo tih sawiin HCDC chuan, "Hnathawh muang lutuk hi fûrpui thlen hma ngeia zo turin thawktute kan ngen a, metal road phah mek pawh ár thai chhiat mai theih ni lo se kan duh hle. Tuna an siam dan hi chuan kan duhthu a sâm lo hle a ni," an ti a; ṭha taka thawh a nih loh chuan hma an lak zel dawn thu an sawi.

HCDC chuan, Thinghlun khuaa Mizo IR awmna chu fûr thlen hma ngeia ṭha zawka siam ngei turin sorkar an ngen bawk.